Sumqayıt şəhəri Stansiya Sumqayıt və Dəmir yolunun yük həyəti adlanan qəsəbədə yaşayan sakinlər övladlarının ölüm təhlükəsi ilə üz-üzə qalması ilə bağlı redaksiyamıza məktub ünvanlayıblar.

Sumqayit.tv-yə məktub ünvanlayan qəsəbə sakinləri qeyd edir ki, öz övladlarını yaxınlıqda Tuqzavod deyilən ərazidə yerləşən 42 saylı məktəbə aparırlar. Ancaq bunun üçün Bakı-Quba dairəvi yolunu keçməli olurlar. Bu ərazi isə yaşayış yerindən aralı yerləşdiyi üçün avtomobillər yüksək sürətlə hərəkət edir. Ələlxüsus ağır tonnajlı avtomobillərin bu  yoldan sürətli şəkildə keçməsi bu yoldan əks tərəfə keçənlər üçün faktiki olaraq ölüm təlükəsi yaradır. Üstəlik, yolun ortasında dəmir maneələr var. Valideynlər məcbur qalıb öz övladlarını dəmir maneələrin üstündən keçirməklə məktəbə aparırlar. Bu isə 600 yaşayış evi olan qəsəbə sakinləri üçün əziyyət deməkdir. Sakinlər deyir ki, yoldan keçən ağır tonnajlı avtomobillər bir anlığa əyləci basmaq istəsə, o zaman faciənin miqyası böyük olacaq. Onlar aidiyyatı qurumlardan ölüm-itim olmadan məsələnin həlli üçün kömək istəyir.

P.S. Hər halda, dəmir ara kəsmələri açmaq, piyada keçidi işarəsi qoymaq və piyada zolağı çəkmək böyük problem deyil.