Yer kürəsi ağır pandemiya şəraitini yaşayaraq silkələndiyi bir zamanda bəzi dövlətlər də çöküş dönəminə qədəm qoyur. Buna rəğmən hər ölkə çalışır ki, öz vətəndaşlarını anbaan artan çətinlik və problemlərdən xilas etsin. Azərbaycanda isə mənzərə müəyyən qədər fərqlidir. Ölkə vətəndaşlarının öz dövlətindən müsbət yöndə gözləntiləri olduğu halda bir sıra qurum var ki, ağır durumdan sui-istifadə  edərək özlərinin imperatorluq sərhədlərini genişləndirməklə məşğuldur. Ən acınacaqlısı isə həmin imperatorluq iddiasında olan məmurlar, vətəndaşların dirisindən də, ölüsündən də pul qazanırlar.
Sumqayit.tv-yə daxil olan şikayət xarakterli məlumata görə, Məhkəmə Tibbi-Eksperiza və Patoloji Anatomiya Birliyi Sumqayıt şəhər Şöbəsində baş verən özbaşınalıq və rüşvət halları nə konstitusiyaya uyğun gəlir, nə də dövlət başçısının məmurlara etdiyi xəbərdarlıqlara, yaxud mütəmadi olaraq, verdiyi tapşırıqlara. Sanki, bu qurum bazar prinsipləri ilə işləyir. İddiaya görə hər bir ölü sahibindən sözügedən idarədə 120-130 AZN pul istənilir. Əvəzində isə heç bir qəbz ödənilmir ki, bu da alınan pulların rüşvət xarakterli olduğuna dəlalət edir və idarə haqqında mənfi imic formalaşdırır.
Şübhəsiz ki, ölkənin bütün qurumları işlək mexanizm vəziyyətində olmalı, dövələtimizin və ölkə vətəndaşlarımızın düşdüyü ağır durumdan çıxması üçün əl-ələ verib çalışmalıdırlar. Əfsuslar olsun ki, istər pandemiya dövründə, istərsə də 44 günlük zəfərlə yekunlaşan müharibə dövründə bir sıra qurumlar var ki, onların fəaliyyətsizliyini müşahidə etdik. Bu “prinsip” hazırda da davam etməkdədir. 
“Belə qurumların insanları narazı salması birbaşa ölkə başçısı cənab İlham Əliyevin yürütdüyü siyasətə ziddir və dövlətçiliyə qarşı atılan addımdır”, -deyərək, hələlik adını çəkmədiyimiz vətəndaş şikayət xarakterli müraciətində bildirib.   
Qarşı tərəfin də mövqeyini dinləməyə hazırıq.