Bu gün (r.e.d.-26.12.2022) Azərbaycan Silahlı Qüvvələrinin əsgəri Yusifov  Hüseyn İsaq oğlunun şəhadətə ucaldığı gün qeyd olunub.
Sumqayit.tv xəbər verir ki, şəhidimizin anım mərasimi Şəhidlər Xiyabanını ziyarətlə başlayıb. Sonra isə şəhərimizdə  fəaliyyət göstərən mərasim evlərinin birində ehsan süfrəsi verilərək davam edib. Məclisdə Sumqayıt şəhər İcra Hakimiyyətinin nümayəndələri, qazilər və şəhid ailələri iştirak ediblər.
Qeyd edək ki, Hüseyn Yusifov 12.07.2002-ci il tarixində Ağstafa rayonunun Poylu kəndində dünyaya gəlib. 2009-cu ildə Ağstafa rayon Poylu kəndində yerləşən Sirəcəddin Məmmədov adına tam orta məktəbinə gedib. 2014-cü ildən isə təhsilini Sumqayıt şəhər 14 nömrəli tam orta məktəbdə davam etdirib. 2020-ci ildə Hüseyn orta məktəbi bitirib və hərbi xidmətə çağırılıb. 27.09.2020-ci il tarixində Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Hüseyn Yusifov Suqovuşan və Ağdərə döyüşlərində savaşıb. 2020-ci il oktyabrın 2-də isə Ağdərə istiqamətində gedən döyüşlərdə qəhrəmancasına şəhid olub. 88 gün itkin düşmüş sayılan əsgərimizin nəşi dekabrın 26-da aşkarlanıb. Azərbaycan Prezidenti İlham Əliyevin Sərəncamına əsasən Yusifov Hüseyn ölümündən sonra "Vətən uğrunda", "Suqovuşanın azad olunmasına görə" və "Cəsur döyüşçü" medalları ilə təltif edilib.
Ruhun şad olsun, Şəhidim! 

Jurnalist:Vəsiqə DADAŞOVA