Sumqayıt Şəhər Məhkəməsində xuliqanlıqda təqsirləndirilən Lalə Əliyevanın (ad-soyad şərti) cinayət işi üzrə məhkəmə istintaqı başa çatıb.
Sumqayit.tv Pravda.az xəbər verir ki, hakim Fikrət Əliyevin sədrliyi ilə keçirilən prosesdə hökm oxunub.
Məhkəmənin hökmü ilə qadına 1 000 manatlıq cərimə cəzası verilib.
İttihama görə, hadisə Sumqayıt şəhəri, Sərvər Bədəlbəyli küçəsində yerləşən “Qayalı” marketdə qeydə alınıb.
Belə ki, Sumqayıt şəhər sakini, 1986-cı il təvəllüdlü Lalə Əliyeva iki azyaşlı uşağı ilə birgə həmin marketə gəlib. O, paltarlardan birini almaq istəyən zaman qiymətinin üzərində olmadığını görüb və satıcı Sənəm Həsənovadan (ad-soyad şərti) soruşub.
Təqsirləndirilən şəxsin məhkəmə ifadəsində dediyinə görə, satıcı ona kobud cavab verib. Bu zaman tərəflər arasında mübahisə düşüb. Nəticədə Lalə Sənəmi təhqir edərək marketdə olan digər işçilərin, müştərilərin və öz uşaqlarının gözü qarşısında onun sifətinə yumruqla vurub. Daha sonra orada olan şəxslər qadınları ayırıblar.
Sənəm Həsənovanın şikayəti əsasında saxlanılan Lalə Əliyeva barəsində Cinayət Məcəlləsinin xuliqanlıq maddəsi ilə cinayət işi başlanılıb, başqa yerə getməmək haqqında iltizam qətimkan tədbiri seçilib.