10.01.2023-cü il tarixdə Azərbaycanın bütövlüyü uğrunda 44 günlük Vətən müharibəsində şəhidlik zirvəsinə ucalan, şəhid Cəbrayılov Elçin Surxay oğlunun doğum günü qeyd olunub. 
Sumqayit.tv xəbər verir ki, bu münasibətlə Elçinin təhsil aldığı 23 saylı tam orta məktəbin direktoru Reyhan Yunisova, 3-cü "D" sinifinin rəhbəri Nahidə Quliyeva və əlaçı şagirdləri Yusif Abdullazadə, Nərmin Abdulova və Xatirə Musayeva şəhidimizin ailəsini ziyarət ediblər. Ziyarət zamanı şəhidin xatirəsi etiramla yad edilib, Onun vətəninə, xalqına və dövlətinə  necə bağlı biri olması haqqında söz açılıb. Daha sonra sözügedən sinifin şagirdləri Elçin Cəbrayılovun döyüş yolu haqqında  haqqında müəllimlərindən öyrəndiklərini və şəhidlərə aid şerləri səsləndiriblər. 

Qeyd edək ki, Azərbaycan Ordusunun kiçik çavuşu olan Elçin Cəbrayılov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Hadrut qəsəbəsinin və Füzulinin azadlığı uğrunda gedən döyüşlərdə savaşıb. Elçin Cəbrayılov oktyabrın 21-də Füzuli döyüşləri zamanı şəhid olub. Sumqayıt şəhərinin Şəhidlər Xiyabanında dəfn olunub.
Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin 15.12.2020-ci il tarixli Sərəncamına əsasən Elçin Cəbrayılov ölümündən sonra "Vətən uğrunda" medalı ilə təltif edildi.
Azərbaycanın Füzuli rayonunun işğaldan azad edilməsi uğrunda aparılan döyüş əməliyyatlarına qatılaraq şəxsi igidliyi və şücaəti nümayiş etdirdiyinə görə Azərbaycan Prezidenti İlham Əliyevin 25.12.2020-ci il tarixli Sərəncamına əsasən Elçin Cəbrayılov ölümündən sonra "Füzulinin azad olunmasına görə" medalı ilə təltif edildi.

Allah rəhmət etsin!