Sumqayıt şəhər sakinləri günlərlə suyun gəlməsməsi ilə bağlı Musavat.com-a şikayət ediblər.
2-ci mikrorayonda yaşayan Fəridə Əliyeva redaksiyamıza müraciət edərək köməklik göstərilməsini xahiş edib:
“Filan mikrorayonlarda su olmayacaq" deyə hər üç gündən bir elan gəlir. Srağagün də su yox idi, dünən gəldi, yenə bu gün kəsilib. Beləcə neçə vaxtdır ki, əziyyət çəkirik. Bizim əlavə çənimiz yoxdur, yığışdırıblar, ona görə su kəsilən kimi əziyyət çəkirik, ehtiyat üçün qablarda saxladığımız sular da bitib. Evdə səliqə sahmanımız da qalmayıb, hara baxırsan su çəlləkləridir. Əgər bizə bu şəkildə, fasilələrlə su veriləcəksə, artıq işimizi bilək. Yenidən su çəni alaq”.
Məsələ ilə bağlı “Azərsu” ASC-nin mətbuat katibi Anar Cəbrayıllı ilə əlaqə saxladıq.
O, Musavat.com-a dedi ki, problemlə maraqlanıb:
“Orada əməkdaşlar təmir-bərpa işləri görürlər. Həmin ərazidə qəzalı xətt var idi. Onu hissə-hissə dəyişiblər. Ora siyirtmə quraşdırılıb, artıq problem həll olunub. Bundan sonra suyun verilişində problem olmayacaq”