Sumqayit.tv xəbər verir ki, Demokrat.az-ın əldə etdiyi məlumata görə, istintaq orqanı tərəfindən Əsədin barəsində Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham elan edilib. 

Cinayət işi üzrə təqsirləndirilən şəxs qismində ifadə verən Əsəd ona elan olunmuş ittiham üzrə özünü təqsirli bilib. 

O bildirib ki, 2011-ci il tarixdə Zəminə ilə rəsmi olaraq evləniblər və onların birgə nigahdan 5 övladları var: 

“Hadisə günü, təxminən saat 14.00-da yaşadığım mənzilə sərxoş vəziyyətdə gəldim. Evdə olduğu zaman arvadım məni nalayiq ifadələr işlədərək spirtli içki qəbul etməməyimi bildirdi. Aramızda mübahisə baş verdi. Həmin mübahisə zamanı əsəbiləşərək həyat yoldaşımın üstünə getdim. Yumruqla onun başından və qolundan bir neçə zərbə vuraraq xəsarət yetirdim. Sonra evdən çıxaraq getdim”. 
Əsəd ifadəsində törətdiyi əməldən peşman olduğunu deyib. 

Cinayət işi üzrə zərərçəkmiş qismində ifadə verən Zəminənin sözlərinə görə, Əsəd tez-tez spirtli içki qəbul etməsi səbəbindən aralarında mübahisələri olub. 

O deyib ki, Hadisə baş verən günü, saat 14.00-da Əsəd yaşadıqları ünvanda spirtli içki qəbul edərək onunla mübahisə etməyə başlayıb. 

Zəminənin ifadəsinə görə, Əsəd onun üstünə gələrək əli ilə başından və qollarından vuraraq onu döyüb: 

“Bu zaman Əsədin haqqında polisə şikayət edəcəyimi bildirdim. Əsəd qolumdan tutaraq geriyə itələdi və evdən getdi. Mən hadisə gününün sabahısı Daxili İşlər Nazirliyinin 102 xidmətinə zəng edərək məlumat verdim”.

Bu cinayət işinə Sumqayıt şəhər Məhkəməsində baxılıb. 

Məhkəmənin hökmü ilə Əsəd 240 saat ictimai işlər cəzasına məhkum edilib.