“Öncə onu qeyd etmək lazımdır ki, Azərbaycan və Bolqarıstan arasında münasibətlər hər zaman yüksək səviyyədə olub. 31 il əvvəl qurulan münasibətlərin tarixinə baxsaq görərik ki, Azərbaycan-Bolqarıstan əlaqələri bir sıra sahələr-siyasi, iqtisadi, enerji, mədəni istiqamətlərdə inkişaf edib”. Bu sözləri SİA-ya açıqlamasında politoloq Elçin Abdullayev deyib.
Onun sözlərinə görə, bu münasibətlərin yüksək səviyyəyə qalxması isə əsasən Azərbaycan Prezidentinin 2015-ci ildə Sofiyaya rəsmi səfəri zamanı Strateji tərəfdaşlıq haqqında Birgə Bəyannamənin imzalanması ilə daha yüksək dinamika halına gətirildi: “Mühüm əhəmiyyət daşıyan məlum sənəd, tərəflərə həm ikitərəfli formatda, həm də beynəlxalq miqyasda əməkdaşlığı genişləndirmək imkanları açmış oldu. Birgə Bəyannamənin nəticəsi olaraq Bakı ilə Sofiya arasında Strateji Dialoq adı altında iki dəfə iclas keçirilib, dövlət və hökumət nümayəndələrinin intensiv səfərləri baş tutub.
O cümlədən, ötən ay ölkəmizə səfərə gələn Bolqarıstan prezidenti Rumen Radevinin, bu gün isə Azərbaycan liderinin Sofiyaya səfərini iki ölkə arasında yaranmış xoş münasibətlərin təzahürü kimi qiymətləndirmək olar. Ümumiyyətlə bilirik ki, son illər Rusiya-Ukrayna müharibəsinin fonunda dünya o cümlədən də Avropa enerji böhranı yaşamaqdadir”.



Politoloq sözlərinə davam edərək bildirib ki, belə olan halda Azərbaycanın dəyəri və çəkisi dünya dövlətləri, eyni zamanda “köhnə qitə” ölkələri üçün əhəmiyyətli dərəcədə artmış oldu: “O cümlədən, balkan ölkəsi olan Bolqarıstan üçün də vəziyyət belədir. Danılmaz faktdır ki, Azərbaycanın enerji təminatında mühüm rol oynaması, xarici siyasətimizin prioritet istiqamətlərdən birinə çevrilib. Bu da Avropanın Azərbaycanla əməkdaşlığa marağını artırmış olur.
Ölkəmizin enerji bazarında əhəmiyyətli rol oynaması, ondan xəbər verir ki, nəinki, təkcə Azərbaycan-Bolqarıstan münasibətləri eyni zamanda, Azərbaycanın digər Avropa ölkələri ilə də əlaqələri bundan sonra daha da genişlənəcək və inkişaf edəcək. Bu isə ondan xəbər verir ki, Avropanın enerjiyə olan ehtiyacı, Bakıya imkan verəcək ki, hələ də bəzi xarici qüvvələrin Qarabağ üzərində oynadıqları oyunu poza bilsin”.
Müəllif: Ləman Əlizadə