Özbəkistanın “Artel Engineering and Management” MMC-nin nümayəndələri iyulun 31-də Sumqayıt Kimya Sənaye Parkının fəaliyyəti ilə tanış olublar.
İZİA-dan verilən məlumata görə, qonaqlara ölkəmizdə fəaliyyət göstərən sənaye zonaları, burada sahibkarlar üçün yaradılan əlverişli biznes mühiti, investisiya imkanları barədə məlumat verilib, sənaye zonalarının və “Artel Engineering and Management” MMC-nin fəaliyyətini əks etdirən təqdimatlar nümayiş etdirilib.
Görüş çərçivəsində Azərbaycanda mövcud sənaye parklarında məişət texnikası, liftlər və alüminium profillərin istehsalı sahəsində birgə layihələrin həyata keçirilməsi imkanları müzakirə edilib.
Daha sonra qonaqlar Sumqayıt Kimya Sənaye Parkında görülmüş işlərlə, Sənaye Parkının rezidenti “STP” MMC-nin Ağır maşınqayırma və Elektrik avadanlıqları zavodlarında gedən istehsal prosesləri ilə tanış olublar.
Qeyd edək ki, artel Mərkəzi Asiyada məişət texnikası və elektronika istehsalı üzrə liderdir. Şirkət 2011-ci ildə qaz sobalarının istehsalı ilə fəaliyyətə başlayıb. Bu gün şirkət tərəfindən 20-dən çox çeşiddə məhsulların - məişət texnikası, o cümlədən kondisionerlər, mikrodalğalı sobalar, mini sobalar, qaz və elektrik sobaları, televizorlar, soyuducular, mobil telefonlar, quraşdırılmış məişət texnikası, tozsoran, kiçik məişət texnikası və s. istehsalı həyata keçirilir.