Sumqayıt şəhərində 1975-ci il təvəllüdlü Mahmud ailə həyat yoldaşı Səbinəyə (adlar şərti verilib – red.) xəsarət yetirib. 
Sumqayit.tv xəbər verir ki,  hadisə Sumqayıt şəhəri, Xəzər bağlarında baş verib. 
Mahmud yaşadığı fərdi həyət evində Səbinə ilə şəxsi münasibətlər zəminində mübahisələri baş verib. 
Mübahisə zamanı Mahmud arvadının sağ gicgah nahiyənə vuraraq ona xəsarətlər yetirib. 
Hadisəni törədən Mahmudun barəsində Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham elan edilib. 
Cinayət işi üzrə təqsirləndirilən şəxs qismində ifadə verən Mahmud ona elan olunmuş ittiham üzrə özünü təqsirli bilib. 
O bildirib ki, Səbinə ilə 2001-ci ildə ailə həyatı qurub, birgə nikahlarından iki oğul övladları var: “Son vaxtlar ara-sıra aramızda mübahisə olur. Hadisə günü, saat 19.30-da yaşadığımız evin həyətyanı sahəsində olarkən Səbinə mənə alış-veriş etmək üçün marketə getməyimi istədi. Mən həmin vaxt pulumun olmamasını dedim. Bu zaman Səbinə “sənin 50 manat pulun var idi, hardadı o pul” deyə soruşdu. Mən də dedim ki, borcum var idi, onu qaytarmışam. Bu zaman aramızda mübahisə yarandı. Mübahisə zaman əsəblərimi cilovlaya bilmədim. Səbinənin baş və üz nahiyəsinə şillə zərbə vurdum. Səbinəyə xəsarət yetirən zaman evdə heç kim olmayıb. Aramızdakı münaqişə təxminən 5 dəqiqə davam etdi, münaqişəyə kənar şəxslər gəlməyib”. 
Bu cinayət işinə Sumqayıt şəhər Məhkəməsində baxılıb. 
Məhkəmə təqsirləndirilən şəxsin zərərçəkmişlə barışmasını, zərərçəkmiş şəxsin ondan şikayətçi olmamasını nəzərə alıb. 
Bu səbəbdən Mahmudun barəsində olan cinayət təqibinə xitam verilib. 
O, cinayət məsuliyyətindən azad edilib. //demokrat.az