Sumqayıt şəhərində 1992-ci il təvəllüdlü Rəşad qardaşı Elxana (adlar şərti verilib – red.) xəsarət yetirib. 
Sumqayit.tv-in əldə etdiyi məlumata görə, hadisə Sumqayıt şəhəri, 49-cu məhəllə ərazisində baş verib. Rəşad birgə yaşadıqları evin həyətində aralarında şəxsi münasibətlər zəminində yaranmış mübahisə zamanı qardaşı Elxanı vuraraq ona bədən xəsarəti yetirib.
Hadisəni törədən Rəşadın barəsində Cinayət Məcəlləsinin 128-ci (qəsdən sağlamlığa xəsarət yetirmə) maddəsi ilə ittiham verilib. 
Cinayət işi üzrə təqsirləndirilən şəxs qismində ifadə verən Rəşad ona elan olunmuş ittiham üzrə özünü təqsirli bilib. O bildirib ki, son 22 ildir Sumqayıt şəhəri, 49-cu məhəllə ərazisində yerləşən fərdi evdə özü, qardaşları Elxan və Elmir, anası Südabə, qardaşı Elxanın arvadı və 2 azyaşlı övladı yaşayırlar: “Hadisə günü, gecə saat təxminən 01-02 radələrində yaşadıqları evdə olan zaman həyətdə qardaşım Elxanla aramızda mübahisə yarandı. Həmin vaxt qardaşımız Elmir də yanımızda olub”. 
Təqsirləndirilən şəxs qeyd edib ki, mübahisəyə səbəb qardaşı Elxanın evli olduğu halda başqa qadınla münasibət saxlaması olub: “Mübahisə zamanı əsəbləşərək yumruqla bir dəfə Elxanın sol gözünə vurdum. Həmin vaxt digər qardaşım Elmir araya girərək bizi ayırdı. Sonra Elxan Daxili İşlər Nazirliyinin 102 xidmətinə zəng edərək hadisə barədə məlumat verdi. Sonra polis əməkdaşları hadisə yerinə gəldilər. Hadisədən bir müddət sonra qardaşım Elxan işləmək üçün Rusiyaya getdi. Hazırda da oradadır. Əməlimdən peşman olmuşam. Qardaşımla barışmışam”.
Bu cinayət işinə Sumqayıt şəhər Məhkəməsində baxılıb. 
Məhkəmə təqsirləndirilən şəxsin zərərçəkmişlə barışmasını, zərərçəkmiş şəxsin ondan şikayətçi olmamasını nəzərə alıb. 
Bu səbəbdən Rəşadın barəsində olan cinayət təqibinə xitam verilib. O, cinayət məsuliyyətindən azad olunub.//Demokrat.az