Gəncə Ağır Cinayətlər Məhkəməsində qəsdən sağlamlığa ağır zərər vurmada təqsirləndirilən Babək Nəsirovun cinayət işi üzrə məhkəmə iclası başa çatıb.
Sumqayit.tv xəbər verir ki, hakim Natiq Əliyevin sədrliyi ilə keçirilən prosesdə hökm oxunub.
Məhkəmənin hökmü ilə o, 8 il 6 ay müddətinə azadlıqdan məhrum edilib. 
Qeyd: Hadisə 30 yanvar 2023-cü il tarixdə, saat 16 radələrində Gəncə şəhəri ərazisində qeydə alınıb. Belə ki, Sumqayıt şəhər sakini, 1989-cu il təvəllüdlü Babək Nəsirov Gəncə şəhərində yaşayan qeyri-rəsmi ər-arvad münasibətlərində yaşadığı arvadı, 1993-cü il təvəllüdlü Elnurə Əlimərdanova ilə mübahisə edib. Mübahisəyə səbəb isə kişinin iki azyaşlı övladlarını özü ilə birlikdə aparması olub. Nəticədə o, qadını boyun nahiyəsindən bıçaqlayıb. Həmçinin qadının qardaşını, 1992-ci il təvəllüdlü Elnur Rövşən oğlu Əlimərdanovu kürəyindən, onların əmisi, 1980-ci il təvəllüdlü Elşən Qabil oğlu Əlimərdanovu isə boyun nahiyəsindən bıçaqlayıb, daha sonra isə hadisə yerindən qaçıb. Hər üç zərərçəkən xəstəxanaya yerləşdirilib, cərrahiyyə əməliyyatı olunub. Daha sonra Babək Nəsirov Sumqayıt şəhərində saxlanılaraq istintaqa təhvil verilib.