Əməkdar artist Vasif Məhərrəmli verilişdə açıqlaması zamanı xaş yeməyi ilə bağlı ilginc fikirlər səsləndirib. Müğənni deyib ki, xaş hambal yeməyidir.
Sumqayit.tv xəbər verir ki, məsələylə bağlı redaktor.az-a danışan qida məsələləri üzrə ekspert İlkin Şirinov müğənninin fikirləri ilə razılaşmadığını bildirib.
Onun sözlərinə görə, xalqımızın mətbəxi də, musiqisi də zəngindir və bu gün hansısa bir müğənninin mətbəximizlə bağlı bu cür əsassız fikir səsləndirməsi qəbulolunmazıdır:
“Yaxşı olardı ki, müğənnilər öz sənətləri ilə məşğul olsunlar, əgər məşğul ola bilirlərsə. Təbii ki, bu gün həmin o müğənnilər xalqın maddiyatı hesabına gəlib özlərinə bahalı villalar, maşınlar alıblar. Ona görə də xalqa məxsus olan hər hansısa bir yeməyi, milli dəyərləri küçültmək qəbul olunmaz bir məsələdir”.
Ekspert xaşın qədim türk yeməyi olduğunu bildirib:
“Xaş əsasən kəllə-paça və sair adlarla hər zaman tarixə düşüb. Araşdırsaq görərik ki, xaş qədim türk yemək növüdür. Xaşla bağlı müxtəlif fikirlər səsləndirilir və bildirilir ki, sümüklərində sınıq və zədə olan insanlara da həkimlər xaş yeməyi məsləhət görürlər. Xaş elə bir yeməkdir ki, insanlar onu yedikdən sonra aktiv həyat tərzi keçirməlidir. Xaşla bağlı məlumatlara tarixdə də rast gəlmək mümkündür. Nizami Gəncəvinin əsərlərində də bu haqda fikirlər səsləndirilir. Xaş haqqında hər hansısa bir araşdırma aparmadan onun hambal yeməyi olması haqda fikirlər səsləndirmək yolverilməzdir”.
Qeyd edək ki, müğənni Vasif Məhərrəmli xaş haqqında bunları deyib: "Xaş hambal yeməyidir. Əsrin əvvəlində İrandan bura olan axında əziyyət çəkən hamballar olub. Heyvanın baş-ayağını atırmışlar. Hansısa bir hambal götürür onu bişirir və nəticədə xaş olur"