Corat qəsəbəsində evə silahlı basqın edərək 3 nəfəri öldürüb, 3 nəfəri yaralamaqda şübhəli bilinən Müşfiq Tağıyevin cinayət işi üzrə məhkəmə prosesi davam etdirilib.
Sumqayit.tv-in məlumatına görə, fevralın 5-də Sumqayıt Ağır Cinayətlər Məhkəməsində hakim Hafiz Əliyevin sədrliyi ilə keçirilən prosesdə şahidlər ifadə verib.
Fövqəladə Hallar Nazirliyinin (FHN) iki əməkdaşı şahid qismində ifadə verib. Onlar bildiriblər ki, hadisə baş verən ünvanda yanğın olduğu üçün həmin ərazidə orada olub.
“İçəri keçəndə ilk olaraq yaralı kişini gördük. Qarnını tutduğu üçün elə bildim tüstüdən zəhərlənib. Lakin sonra qarnından qan axdığını görəndə yaralı olduğunu başa düşdüm. Yaralanı xərəyə qoyduq, daha sonra içəri keçəndə isə həyətdə bir qadın və bir kişi meyitinin də olduğunu gördüm. Hadisənin səbəbi və yanğının nədən baş verməsi barədə heç bir məlumatım yoxdur”.
Daha sonra təqsirləndirilən şəxsin qardaşı Xəqani Tağıyev şahid kimi ifadə verib:
“Mən bilən, Müşfiq Tağıyevin silahı yox idi. Amma evdə atamın adına rəsmi sənədləri olan ov tüfəngi olub. Atam rəhmətə gedəndən sonra 2016-cı ildə Müşfiq Daxili İşlər Nazirliyində həmin silahı öz adına keçirib. 2020-ci ildə isə o silah satılıb. Cinayət yerində olan silahı isə görməmişəm.
Qardaşımla eyni evdə yaşasaq da, mən onun işlərinə qarışmamışam, heç otağına da girmirdim. Qarşı tərəflə də hər hansı ədavətimiz olmayıb. Sonradan öyrəndiyim məlumata görə, bu işin kökündə Anar Fərəclinin qardaşıma qarşı əxlaqsızlıq etməsi olub. Qardaşım söyüş üstündə kimisə öldürəcək adam deyildi. Onun öz yaşıdları arasında özünə görə hörməti olub”.
Təqsirləndirilən Müşfiq Tağıyevin əmisi də şahid kimi ifadə verib:
”Mənə Polis İdarəsindən Müşfiqin saxlanılması barədə zəng gələndə hadisədən xəbər tutmuşam. Ondan əvvəl isə heç nədən xəbərim olmayıb. Müşfiq bi iş barədə də mənimlə heş nə paylaşmayıb”.
Məhkəmənin növbəti iclası fevralın 19-na təyin edilib.
Qeyd edək ki, ötən il oktyabrın 28-də saat 05:50 radələrində Sumqayıt şəhərinin Corat bağları yaşayış massivində yerləşən fərdi yaşayış evlərindən birində odlu silahdan açılan atəş nəticəsində iki nəfər - Susana Karakaş və Dağbəyi Fərəcov ölüb.
Hadisə zamanı Tərlan Fərəcova, Serkan Karakaş, daha sonra isə hadisə yerinə gələn qonşular - Etibar Sarıyev və Mehman Sarıyev xəsarət alıblar. Sonradan yaralılardan biri - Türkiyə xəstəxanasına köçürülən Serkan Karakaş da orada dünyasını dəyişib.
Polis əməkdaşları tərəfindən keçirilən tədbirlərlə hadisəni törətməkdə şübhəli bilinən Corat qəsəbə sakini, 1987-ci il təvəllüdlü Tağıyev Müşfiq Məhəmməd oğlu saxlanılıb.
İstintaqla 1987-ci il təvəllüdlü Müşfiq Tağıyevin qonşusu Anar Fərəcovdan qisas almaq məqsədilə sonuncunun ailəsinin yaşadığı həyətə gələrək evin divarlarına benzin töküb yandırması və özünün hazırladığı partlayıcı qurğunu partlatdıqdan sonra odlu silahdan atəş açaraq evdən çıxan Dağbəyi Fərəcov, Susana Karakaş və Serkan Karakaşı qəsdən öldürməsi, sonuncuların evdə aşkar surətdə köməksiz vəziyyətdə olan 2 azyaşlı övladını, eləcə də Tərlan Fərəcovanı və köməyə gələn qonşuları Etibar Sarıyev və Mehman Sarıyevi qəsdən öldürməyə cəhd etməsinə əsaslı şübhələr müəyyən edilib.
Müşfiq Tağıyevə Cinayət Məcəlləsinin 120.2.4, 120.2.7 (xüsusi amansızlıqla və ümumi təhlükəli üsulla iki və ya daha çox şəxsi öldürmə), 29,120.2.3, 29,120.2.4, 29, 120.2.7 (xüsusi amansızlıqla və ümumi təhlükəli üsulla ictimai borcunu yerinə yetirən iki şəxsi öldürməyə cəhd), 29,186.2.1, 29,186.2.2 (külli miqdarda ziyan vurmaqla yandırmaqla və partlatmaqla əmlakı qəsdən məhv etməyə cəhd), 228.1, 228.4 (qanunsuz olaraq odlu və soyuq silah əldə etmə və gəzdirmə) və 229.1, 229.4-cü (qanunsuz olaraq partlayıcı qurğuları, qaz silahını, soyuq silahı hazırlama) maddələri ilə ittiham elan edilərək barəsində istintaq orqanının vəsatəti və ibtidai araşdırmaya prosessual rəhbərliyi həyata keçirən prokurorunun təqdimatı əsasında məhkəmənin qərarı ilə həbs qətimkan tədbiri seçilib. //Report