Azərbaycan milli komandası növbəti yoldaşlıq oyununa çıxacaq.
Sumqayit.tv xəbər verir ki, yığmamız bu dəfə Haitini qəbul edəcək.
Oyun Mehdi Hüseynzadə adına Sumqayıt şəhər stadionunda baş tutacaq və bu, "gənclik şəhəri"nin tarixində ilk dəfə milli komandanın oyununa ev sahibliyi etməsi ilə yadda qalacaq.
İndiyədək Azərbaycan millisi 113 oyununu 12 fərqli arenada keçirib. Belarusla qarşıdakı görüşün də fərqli bir stadionda təşkil olunması ilə Sumqayıt şəhər stadionu və "Bank Respublika Arena" bu siyahıya 13-cü və 14-cü arenalar kimi əlavə olunacaq.
Bununla da, Sumqayıt milli komandamıza ev sahibliyi edən 8-ci şəhər olacaq. Daha öncə millimiz ev oyunlarını Bakı, Gəncə, Lənkəran və Qəbələdə keçirib. Bundan başqa, bəzi səbəblərə görə, Türkiyənin Trabzon, Albaniyanın Elbasan və Xorvatiyanın Zapreşiç şəhərlərində də oyunlar baş tutub.
Qeyd edək ki, Azərbaycan – Haiti matçı martın 22-də keçiriləcək.