Son günlər mediada yayılan məlumatlara görə, Ukrayna Prezidenti Volodimir Zelenski Rusiya ilə danışıqlar masasına oturmağa hazırdır. Rusiyanın mövcud tələbləri qarşılığında Ukraynanın bu cür addım atması Zelenskinin Putinin şərtlərini qəbul etməsi, məğlub formada sülh danışıqlarına gedəcəyinə dair fikirlər səsləndirilir.

Təslimiyyətdən sonra Zelenskinin taleyi necə olacaq? Onu Rusiyaya təhvil verə, yaxud da sabiq Suriya Prezidenti Bəşər Əsədlə dəyişə bilərlərmi?


Globalinfo.az-a danışan politoloq Elçin Abdullayev deyib ki, Ukrayna prezidenti Rusiya ilə danışıqlar masasına oturmaq istədiyini bəyan etdiyinə dair artıq müxtəlif mənbələrdən tez-tez məlumat verilir:

“Zelenskinin bu yanaşmasının təslim olmaq kimi qələmə verilməsi doğru olmazdı. Ümumiyyətlə, Rusiya-Ukrayna müharibəsində bu iki ölkənin heç biri qalib deyil. Udan tərəf ABŞ və Qərb oldu. Zelenski məğlub olduğunu boynuna alıb o masada otursaydı heç vaxt Rusiyaya qarşı şərtlər irəli sürməzdi. O, Rusiyanın işğal etdiyi Ukrayna torpaqlarından çıxmasını istəyir. Ukraynanın ərazi bütövlüyünün danışıqlar predimenti olmadığını qeyd edib. Zelenski müharibənin Ukraynaya necə böyük zərər verdiyinin fərqindədir. Bu baxımdan danışıqlar masasına oturmağa razılıq verib”.

Politoloqun sözlərinə görə, Zelenskinin Rusiyaya təhvil verilməsi, yaxud da Bəşər Əsədlə dəyişdirilməsi gözlənilmir:

“Qərb dövlətləri Ukraynanın ərazi bütövlüyünü dəstəkləyir. Zelenksini də Ukraynanın dövlət başçısı kimi qəbul edirlər. Bu baxımdan Qərbin Zelenskini Rusiyaya təhvil verməsi inandırıcı deyil. Bəşər Əsədin vəziyyəti isə fərqli idi. Qərb onu Suriyanın prezidenti deyil, terrorçu kimi qəbul edirdi”.

Safura Bənnayeva