Sumqayıt şəhərini Abşeron rayonunun Saray qəsəbəsi ilə birləşdirən Məhəmməd Əsədov küçəsində inşa edilən yeni körpü tikinti prosesinin son mərhələsinə çatıb.
Sumqayit.tv xəbər verir ki, Azərbaycan Respublikası Prezidentinin müvafiq Sərəncamına əsasən həyata keçirilən tikinti işləri sürətlə davam etdirilir və körpünün yaxın vaxtlarda tam istifadəyə verilməsi planlaşdırılır.

Üç aşırımdan ibarət olan yeni körpü 104 metr uzunluğa və 21,6 metr ümumi enə malikdir. Dörd hərəkət zolağı ilə inşa edilən bu qurğunun hər iki tərəfində piyadaların rahat hərəkəti üçün 2 metr enində səkilər nəzərdə tutulub. İşlərin vaxtında tamamlanması üçün əraziyə lazımi sayda canlı qüvvə və texnika cəlb edilib.

Qeyd edək ki, Sumqayıt-Saray yolunda yerləşən və 1970-ci illərdə inşa edilən əvvəlki körpü istismar üçün yararsız hala düşdüyündən sökülüb, yerində müasir standartlara uyğun yeni körpü tikilir.

Sumqayıt şəhər İcra Hakimiyyətinin başçısı Zakir Fərəcov tikinti ərazisinə baxış keçirərək görülən işlərlə tanış olub. Məlumata görə, körpü istifadəyə verildikdən sonra yolda genişləndirmə işləri aparılacaq. Piyadaların və nəqliyyat vasitələrinin hərəkət rahatlığını təmin etmək məqsədilə əvvəlki yol infrastrukturu körpüyə uyğunlaşdırılacaq. Bu çərçivədə Məhəmməd Əsədov küçəsinin genişləndirilməsi ilə bağlı yeni layihənin hazırlanması və yaxın günlərdə icrasına başlanması qərara alınıb.