Sumqayıt şəhərinin 18-ci mikrorayonunda yerləşən bina sakinləri təhlükəli vəziyyətlə bağlı aidiyyəti qurumlara müraciət ediblər.

Sakinlərin sözlərinə görə, son zəlzələdən sonra binalarında ciddi çatlar və struktur problemləri yaranıb, lakin indiyə qədər heç bir qurum məsələ ilə maraqlanmayıb.

Şikayətçilər Sumqayit.tv-yə bildirirlər ki, məsələ ilə bağlı "Sumqayıt Şəhər İcra Hakimiyyətinə, Fövqəladə Hallar Nazirliyinə və digər aidiyyəti qurumlara məlumat verilsə də, bu günə qədər heç bir tədbir görülməyib. Heç bir rəsmi qurum hər an qarşılaşa biləcəyimiz qəzanın fərqində deyillər. Bələdiyyə hər ay ödəniş toplayır, amma problemlərimizə biganə yanaşılır. Binalarımızın vəziyyəti günbəgün pisləşir və təhlükə artır,” deyə – sakinlər bildirirlər.
İcra Hakimiyyəti binanın qəzalı vəziyyətdə olduğunu təsdiqləyən mütəxəssis rəyinin olduğunu və bununla bağlı FHN-in Tikintidə Təhlükəsizliyə Nəzarət Dövlət Agentliyinə müraciət edilməsini tövsiyə edib. Lakin FHN-dən verilən cavaba görə, bu məsələ onların səlahiyyətində deyil. Digər tərəfdən, Bələdiyyə problemin həllinin Mənzil Kommunal İstehsalat İstismar Birliyinin səlahiyyətində olduğunu bildirib.

Sakinlər isə bu vəziyyətdə çıxılmaz durumda qaldıqlarını və problemin həlli üçün aidiyyəti qurumların heç birinin məsuliyyət götürmədiyini deyirlər. “Bilmirik kimə müraciət edək, hər qurum məsuliyyəti bir-birinin üzərinə atır,” deyə – şikayətçilər bildirirlər.

Qarabağ veteranı Abdulla Hafiz oğlu Bəşırov və digər sakinlər media nümayəndələrini hadisə yerinə baxış keçirməyə və məsələni ictimailəşdirməyə çağırırlar. Onlar məsələ ilə bağlı təcili tədbir görülməsini tələb edirlər.

Qeyd edək ki, 18-ci mikrorayondakı ev 4-də yerləşən mənzillərin (23, 24, 25, 26, 27, 28) sakinləri bu problemlə üzləşib və artıq bir müddətdir ki, cavab gözləyirlər. 

Adı çəkilən qurumların açıqlamasını dərc etməyə hazırıq.