Daxili İşlər Nazirliyinin sabiq əməkdaşı, təqaüdə çıxmış polis polkovniki Şəhriyar Cəfərov qəfil vəfat edib.
Sumqayit.tv-in məlumatına görə, bu barədə Teleqraf-a mərhumun yaxınları məlumat verib.

Bildirilir ki, 58 yaşlı Şəhriyar Cəfərov ürəyində yaranan tromb səbəbindən dünyasını dəyişib. Onun səhhətində əvvəllər heç bir ciddi problem qeydə alınmamışdı.

Mərhum bu gün Sumqayıt şəhər qəbiristanlığında dəfn olunub.

Şəhriyar Əliş oğlu Cəfərov 1968-ci il martın 7-də Sumqayıt şəhərində anadan olub. Əslən Qubadlı rayonunun Tatarlı kəndindən olan Ş.Cəfərov 20 ildən artıq müddətdə daxili işlər orqanlarında çalışıb və bir ay əvvəl təqaüdə çıxıb.

Şəhriyar Cəfərovun iki övladı var. Onlardan biri Azərbaycan Tibb Universitetinin məzunu, digəri isə ADA Universitetinin tələbəsidir.

Qeyd edək ki, mərhumun atası Əliş Cəfərov da Sumqayıtda tanınmış şəxs olub və vaxtilə Sumqayıt Boru-Prokat Zavodunun direktoru vəzifəsində çalışıb.