Sumqayıt şəhərində doqquzmərtəbəli yaşayış binasında yanğın baş verib. Hadisə binanın 7-ci mərtəbəsində, pilləkən qəfəsində yerləşən elektrik sayğaclarında qeydə alınıb.

Sumqayıt.tv xəbər verir ki, Fövqəladə Hallar Nazirliyinin (FHN) verdiyi məlumata görə, yanğın nəticəsində 6 ədəd elektrik sayğacı, 6 qoruyucu açar və 3 paq.m elektrik kabeli yanıb. Hadisə yerinə dərhal yanğınsöndürənlər cəlb olunub.

Yanğınsöndürmə əməliyyatı zamanı 7 nəfər bina sakini təhlükəsiz əraziyə təxliyə edilib. Xoşbəxtlikdən, mənzillər yanğından qorunub. Yanğın FHN-in yanğından mühafizə bölmələrinin səyi nəticəsində tam söndürülüb.

Hadisənin başvermə səbəbləri araşdırılır.