Sumqayıt şəhəri 8-ci mikrorayon ərazisində “Mirxəlil-F” MTK tərəfindən inşa olunan yaşayış binası ilə bağlı vətəndaşların narazılığı artmaqdadır.
Sumqayıt TV redaksiyasına müraciət edən sakinlər bildirirlər ki, onlar 2019-cu ildən bu binadan mənzil almaq üçün böyük məbləğlər ödəyiblər.

Sənədlərdə binanın 2021-ci ildə təhvil veriləcəyi göstərilsə də, bu günə qədər 16, 17, 18 və 19-cu mərtəbələr tam tikilməyib.

“Bizi illərlə gözlədirlər. Evimiz tikilmir, pulumuzu da qaytarmırlar. Sahibkardan isə xəbər yoxdur, sanki yoxa çıxıb,” – deyə narazı vətəndaşlardan biri bildirir.

Tikinti işlərinin nə vaxt tamamlanacağı barədə heç bir rəsmi məlumat yoxdur. Sakinlər məsələ ilə bağlı dəfələrlə müraciətlər etsələr də, nəticə ala bilmədiklərini bildirirlər.

Vətəndaşlar aidiyyəti qurumlara səslənərək, problemin nəhayət ki, həll olunmasını və onların illərlə gözlədiyi evlərinə qovuşmalarını istəyirlər.

Sumqayıt TV qarşı tərəfin də mövqeyini işıqlandırmağa hazırdır.