Aprelin 9-da Sumqayıt Dövlət Universitetində (SDU) "Sumqayıtlı gənc elçilər: Qərbi Azərbaycana qayıdış" mövzusunda konfrans baş tutub.
Sumqayit.tv xəbər verir ki, tədbirdə elm və təhsil nazirinin müavini Firudin Qurbanov, Sumqayıt şəhər İcra Hakimiyyətinin başçısı Zakir Fərəcov, Qərbi Azərbaycan İcmasının rəhbər şəxsləri və üzvləri, Milli Məclisin deputatları, universitetin professor-müəllim heyəti və tələbələr iştirak ediblər.

Konfrans öncəsi iştirakçılar universitetin foyesində Ümummilli Lider Heydər Əliyevin büstü önünə gül dəstələri düzüb, Qərbi Azərbaycana həsr olunan rəsm sərgisi ilə tanış olublar. Tədbir Azərbaycan Respublikasının Dövlət Himninin səsləndirilməsi və şəhidlərin xatirəsinin bir dəqiqəlik sükutla yad edilməsi ilə başlayıb.

SDU-nun rektoru, professor Əminağa Sadıqov çıxışında tədbirin universitetdə keçirilməsini yüksək qiymətləndirib və bu konfransın "Qərbi Azərbaycana qayıdış konsepsiyası"nın reallaşmasına töhfə verəcəyini bildirib. O, gənc nəslin vətənpərvərlik ruhunda tərbiyəsində tarixi yaddaşın önəmini xüsusi vurğulayıb.

Elm və təhsil nazirinin müavini Firudin Qurbanov Qərbi Azərbaycanın tarixi və mədəni irsinin öyrənilməsi və tədrisinin əhəmiyyətindən danışıb. O, bu istiqamətdə təhsil müəssisələrində maarifləndirmə işlərinin davam etdirildiyini qeyd edib.

Akademik Əhliman Əmiraslanov azərbaycanlıların deportasiya tarixinin gənclərə çatdırılmasının vacibliyini vurğulayıb.

Deputat Mehriban Vəliyeva gənclərin bu sahədə aktiv iştirakını və tarixi həqiqətlərin beynəlxalq ictimaiyyətə çatdırılmasını önə çəkib.

Tədbirdə Ulu Öndər Heydər Əliyev və Prezident İlham Əliyevin Qərbi Azərbaycanla bağlı çıxışlarını əhatə edən videoçarx nümayiş olunub. Konfrans çərçivəsində Ayan Yusifzadə, Həsrət Süleymanov, Gülçin Qasımova və Pakistanlı tələbə Muhammad Adnan Gorgaje mövzu ilə bağlı çıxışlar ediblər.

Panel müzakirələrdə millət vəkilləri Əziz Ələkbərli, Hikmət Babaoğlu, Məlahət İbrahimqızı, Şahin İsmayılov və professor Mahirə Nağıqızı müxtəlif aspektlər üzrə Qərbi Azərbaycana qayıdış məsələsini müzakirə edərək gənclərin suallarını cavablandırıblar.

Sonda çıxış edən Sumqayıt şəhər İcra Hakimiyyətinin başçısı Zakir Fərəcov Qərbi azərbaycanlıların yurdlarına qayıdış istiqamətində görülən işlərdən danışıb və SDU-nun bu sahədəki fəaliyyətini yüksək qiymətləndirib.

Tədbir ədəbi-bədii kompozisiyalarla yekunlaşıb.