Sumqayıt şəhərində yerləşən tekstil fabriklərindən birində baş vermiş kütləvi zəhərlənmə hadisəsi Qida Təhlükəsizliyi Agentliyinin (AQTA) nəzarətinə götürülüb. Hadisə nəticəsində ilkin mərhələdə 19 nəfər – 16 qadın və 3 kişi – zəhərlənmə şübhəsi ilə xəstəxanaya yerləşdirilib.
Agentliyin Sumqayit.tv-yə verdiyi məlumata əsasən, hadisə barədə məlumat daxil olan kimi AQTA-nın Abşeron-Xızı regional bölməsinin əməkdaşları dərhal hadisə yerinə yollanıblar. Hazırda hadisənin başvermə səbəbləri, xüsusilə də zəhərlənmənin qida mənşəli olub-olmaması istiqamətində araşdırmalar aparılır. Nəticələr ictimaiyyətə açıqlanacaq.
Sumqayıt Tibb Mərkəzinin nəzdində fəaliyyət göstərən 1 nömrəli Şəhər Xəstəxanasının İnfeksion xəstəliklər şöbəsinə yerləşdirilən şəxslərə “dəqiqləşdirilməmiş bakterial qida zəhərlənməsi” diaqnozu ilə ilkin tibbi yardım göstərilib. Mərkəzin sözçüsü Ramil Zeynallının verdiyi məlumata görə, xəstələrdən 5 nəfərin vəziyyəti qənaətbəxş qiymətləndirilib və onlar ambulator müalicəyə buraxılıb. Qalan 14 nəfərin stasionar müalicəsi isə hazırda davam edir.
Hazırda faktla bağlı araşdırmalar davam etdirilir. Rəsmi orqanların yekun rəyindən sonra hadisənin dəqiq səbəbləri məlum olacaq.
21-04-2025, 19:39
181
