"Xural" Media Qrupunun rəhbəri, tanınmış jurnalist Əvəz Zeynallının səhhətində ciddi problemlər yaranıb. Hal-hazırda Türkiyədə müalicə olunan jurnalistin vəziyyətinin ağır olduğu bildirilir.
Sumqayıt.tv xəbər verir ki, bu barədə məlumatı həyat yoldaşı, jurnalist Məlahət Zeynallı özünün “Facebook” hesabında yayıb. Onun sözlərinə görə, Əvəz Zeynallı qərar vermək və fikirlərini ifadə etmək imkanını itirib.
“Əvəz bəy özü müstəqil olaraq qərar verə bilmir, fikirlərini belə tam şəkildə ifadə edə bilmir. Ona görə də, rəsmi olaraq mənim himayəmdə olan həyat yoldaşımın məsuliyyətini tam şəkildə üzərimə götürərək dövlətə və xalqa müraciət edirəm”, – deyə Məlahət Zeynallı qeyd edib.
O bildirib ki, Əvəz Zeynallı ömrünün böyük bir hissəsini Azərbaycan dövlətinə və xalqına xidmətə həsr edib:
“Vətən sağ olsun! Əvəz bəyin xidmətlərini xalq da, dövlət də unutmur. Bu gün isə onun üçün ən ağır günlərdir. Sabah çox gec ola bilər. Əvəz Zeynallının sağalması üçün gərəkli dəstək yalnız Allahın izni ilə dövlətin və xalqın əlindədir.”
Sonda Məlahət Zeynallı hər kəsi Əvəz Zeynallının müalicəsinə dəstək olmağa çağırıb:
“Bizim zatən dövlətimizdən və millətimizdən başqa heç kimimiz yoxdur. Əvəz Zeynallıya sahib çıxın!”
21-05-2025, 12:04
211
