Sumqayıt şəhəri, Saray bağları, Qurd dərəsi massivi – Bu ərazidə yaşayan sakinlər artıq 3 ildir ki, kanalizasiya problemi ilə baş-başadır. Hər dəfə eyni cavab: “Layihə hazırlanır”.
Bu haqda Sumqayit.tv-yə daxil olan kollektiv şikayətdə bildirilir ki, Ruhulla Axundov küçəsi 50 ünvanında, Murad marketin 150 metr aşağısında yerləşən ərazidə yaşayanlar dəfələrlə “Azərsu” ASC-yə və Sumqayıt şəhəri Bağlar Sukanal İdarəsinə yazılı və telefonla müraciətlər etsələr də, real nəticə yoxdur.
Sakinlərin dediyinə görə, hər dəfə şikayətdən sonra simvolik olaraq bir neçə kanalizasiya borusu gətirilir, yollara düzülür, lakin günlər sonra heç bir iş görülmədən yenidən aparılır. Bu isə əhali arasında aldadılma və məsuliyyətsiz davranış təəssüratı yaradır.
Kanalizasiya sisteminin olmaması səbəbindən ətrafda çirkab sular, natəmiz axıntılar, pis qoxular əmələ gəlir. Bu, uşaqların və yaşlıların sağlamlığı üçün birbaşa təhlükədir.
“Artıq səbir kasamız daşır. Hər dəfə ‘layihə hazırlanır’ bəhanəsi ilə illərlə süründürülürük. Əgər layihə varsa, nə zaman həyata keçiriləcək? Yoxdursa, niyə bizə yalan məlumat verilir?”-deyə, sakinlər bildiriblər.
Sumqayit.tv olaraq bu şikayəti işıqlandırdıq. Ümid edirik ki, rəsmi qurumlar çağırışa cavab verəcəklər.