Bu gün Azərbaycanın Birinci vitse-prezidenti, Heydər Əliyev Fondunun prezidenti, İSESCO-nun xoşməramlı səfiri, Azərbaycan Gimnastika Federasiyasının rəhbəri Mehriban Əliyevanın doğum günüdür.

Sumqayit.tv xəbər verir ki, Mehriban Arif qızı Əliyeva 1964-cü il avqustun 26-da Bakıda anadan olub. Orta məktəbi qızıl medalla bitirdikdən sonra Moskva Dövlət Tibb İnstitutunu fərqlənmə diplomu ilə başa vurub.

1995-ci ildə Azərbaycan Mədəniyyətinin Dostları Fondunu, 1996-cı ildə isə “Azərbaycan-İrs” jurnalını təsis edib. 2002-ci ildən Azərbaycan Gimnastika Federasiyasına rəhbərlik edir. 2004-cü ildən fəaliyyət göstərən Heydər Əliyev Fondunun prezidenti kimi yerli və beynəlxalq miqyasda çoxsaylı humanitar və xeyriyyəçilik layihələrinin müəllifidir.

Onun təşəbbüsü ilə Azərbaycanın mədəni irsi dünyada təbliğ olunub, bir sıra ölkələrdə tarixi abidələrin və muzeylərin bərpası həyata keçirilib. Pakistanda məktəblərin tikintisi, müxtəlif ölkələrdə humanitar aksiyalar keçirilməsi də bu fəaliyyətlər sırasındadır.

Mehriban Əliyeva UNESCO və İSESCO-nun xoşməramlı səfiri olub, ÜST tərəfindən mükafatlandırılıb, həmçinin Fransa, Polşa, Rusiya və digər ölkələrin ali ordenlərinə layiq görülüb. Azərbaycan, Rusiya və Avropanın nüfuzlu ali təhsil müəssisələrinin fəxri professoru və doktorudur.

2017-ci il fevralın 21-də Prezident İlham Əliyevin sərəncamı ilə Azərbaycanın Birinci vitse-prezidenti təyin olunub. Sosial məsələlər, şəhid ailələri, müharibə əlilləri, məcburi köçkünlər və aztəminatlı ailələr daim onun diqqət mərkəzindədir.

Mehriban Əliyeva Yeni Azərbaycan Partiyasının sədr müavinidir. Ailəlidir, iki qızı və bir oğlu var.