Sumqayıtda yenidən ictimai narazılıq doğuran vəziyyət yaşanır. Şəhərin 21-ci məhəlləsində, bina 2/11-in qarşısında yerləşdirilən ticarət köşkü yerli sakinlərin ciddi narazılığına səbəb olub.

Sakinlərin “Sumqayit.tv”- yə bildirdiyinə görə, həmin köşk əvvəllər 5-ci məhəllədə, “Ağ Ev” kimi tanınan binanın qarşısında quraşdırılmış, lakin şikayətlərdən sonra oradan götürülmüşdü. Buna baxmayaraq, köşk bu dəfə 21-ci məhəlləyə gətirilib və yaşayış binasının qarşısında yerləşdirilib.

Sakinlər hesab edirlər ki, bu cür obyektlərin yaşayış binalarının qarşısına, xüsusilə də memarlıq baxımından dəyəri olan ərazilərə qoyulması şəhərin ümumi görkəmini korlayır və piyadaların hərəkətinə mane olur.

Onlar bildirirlər ki, məsələ ilə bağlı aidiyyəti qurumlara dəfələrlə müraciət etsələr də, cavab verilməyib və heç bir tədbir görülməyib. Artıq sakinlər Milli Məclisin sədri Sahibə Qafarovaya da rəsmi məktubla müraciət ediblər.

Sakinlər ümid edirlər ki, bu dəfə məsələ diqqətdən kənarda qalmayacaq və Sumqayıtın şəhərsalma qaydalarına zidd olan bu hal aradan qaldırılacaq.

Qeyd edək ki, son aylarda Sumqayıtda ictimai yerlərin, xüsusən də yaşayış binalarının qarşısında ticarət köşklərinin quraşdırılması ilə bağlı şikayətlər artıb. Şəhər sakinləri məsələ ilə bağlı operativ tədbir görülməsini və şəhərin estetik görünüşünün qorunmasını tələb edirlər.