Sumqayıt şəhəri, Saray Bağları, Qurd Dərəsi massivi və Ruhulla Axundov küçəsinin sakinləri illərdir ki, kanalizasiya sistemi olmadan yaşayırlar.

Sumqayit.tv NOCOMMENT.az-a istinadən xəbər verir ki, sakinlərin məlumatına görə, son 10–15 il ərzində dəfələrlə şikayət və müraciət edilsə də, problem hələ də həll olunmayıb.

Bir neçə dəfə əraziyə kanalizasiya boruları gətirilsə də, işlər yarımçıq saxlanılıb. Aidiyyatı qurumlar tərəfindən əraziyə borular gətirilir, sonra geri qaytarılır, heç bir quraşdırma işi isə aparılmır.

Sakinlər bildirirlər ki, hər müraciət zamanı aidiyyəti qurumlardan yalnız “layihə hazırlanır” kimi şablon cavablar verilir, lakin faktiki heç bir iş görülmür. Nəticədə, evlərin çirkab suları küçələrə axır, pis qoxu və antisanitar vəziyyət yaranıb.

Saray Bağları sakinləri Azərsu ASC, Sumqayıt şəhər Su Kanal və Bağlar Su Kanal idarələrinə müraciət edərək xahiş edirlər ki, məsələ ciddi şəkildə araşdırılsın, kanalizasiya sistemi nəhayət çəkilsin və əraziyə nəzarət olunsun.