Sumqayıt şəhər Təcili Tibbi Yardım Xəstəxanasının Travmatologiya şöbəsinin müdiri, tanınmış travmatoloq, həkim və böyük ziyalı Cəbrayıl Əlinağıyev dünən dünyasını dəyişib.

Professor Ağaxan Talışinski onu belə xarakterizə edirdi: “Travmatologiya böyük cərrahiyədir.” Cəbrayıl Əlinağıyev isə bu sözün canlı nümunəsi idi. Sumqayıtdan və ölkənin müxtəlif bölgələrindən xəstələr ona “Doktor Əlinağıyev” deyə müraciət edir, o isə hər birinə böyük səbr və diqqətlə qulaq asaraq ən düzgün qərarı verirdi. Onun verdiyi ilk diaqnoz və qərarlar nadir hallarda yanılırdı və bu səbəbdən ölkənin hər yerindən sınıq-çıxıq, sümük xəstəlikləri ilə bağlı xəstələr onun qəbuluna gəlirdi.

52 il ərzində onu yaxından tanıyanlar onu sözün əsl mənasında şəxsiyyət və böyük ürək sahibi, sözünü üzə deyən, sadə və canıyanan insan kimi xatırlayacaqlar. Həmyaşıdları və ondan kiçiklər üçün o, cavan yaşlarından etibarən ağsaqqal simvolu olmuş, illər keçdikcə daha da müdrikləşmişdir.

Cəbrayıl Əlinağıyev el-obasının hörmətini qazanmış, həqiqi şəxsiyyət və həkim nümunəsi olaraq daim xatırlanacaq.

Doğulduğu Masallı rayonunda torpağa tapşırılıb.

Allah rəhmət eləsin.