Sumqayıt şəhərinin 29-cu məhəlləsində, 20 Yanvar küçəsində yerləşən 14/19 nömrəli binanın sakinləri uzun müddətdir ki, “Dürüm House” adlı iaşə obyektinin fəaliyyətindən narazıdırlar.

Sakinlərin Sumqayit.tv-ə bildirdiyinə görə, kafe binaya demək olar ki, söykənərək fəaliyyət göstərir və obyektin havalandırma sistemi düzgün qurulmadığından günün 24 saatı kabab iyinin tüstüsü mənzillərə dolur. Bu səbəbdən binada yaşayanlar pəncərələri açmaqda belə çətinlik çəkirlər.

Şikayətçi iddia edirr ki, məsələ ilə bağlı dəfələrlə obyekt rəhbərliyinə irad bildirilsə də, heç bir nəticə olmayıb. Onların sözlərinə görə, kafe icarədarı post-patrul xidmətində çalışdığı üçün sakinlərin etirazlarına məhəl qoyulmur:

“Dəfələrlə demişik, xahiş etmişik, amma heç bir reaksiya yoxdur. Sanki biz nə deyiriksə, əhəmiyyət vermirlər. Biz isə 24 saat kabab tüstüsünə məcbur qalırıq. Artıq dözüm həddimiz tükənib”- deyə, şikayətçi əlavə edib. 

Sakinlər problemin uzun müddətdir həll olunmaması səbəbindən məsələni ictimailəşdirmək qərarına gəldiklərini deyirlər. Şikayətçilər bildirir ki, tədbir görülməsi üçün artıq dövlət qurumlarına rəsmi müraciət ünvanlamağa hazırlaşırlar.

Redaksiyadan: Məsələ ilə bağlı qarşı tərəfin mövqeyini dərc etməyə hazırıq.

24-11-2025, 17:20 232