Dükan sahibi bildirir ki, sürücü heç nə almadan sadəcə xeyir-dua verib çıxıb.
Sumqayit.tv xəbər verir ki,  redaksiyamıza daxil olan videoda Sumqayıtın 42-ci məhəlləsində Təcili Tibbi Yardım maşınının sürücüsünün xidmətdə olduğu vaxt spirtli içkilər satılan mağazaya daxil olması ilə bağlı iddia gündəmə gətirilmişdi. İzləyicinin sözlərinə görə, video 29 noyabr 2025-ci il, saat 23:56-da çəkilib.

İddiaya əsasən, sürücü TTY avtomobilini saxlayaraq mağazaya daxil olub və qısa müddət sonra spirtli içki aldığı bildirilirdi. Hadisə zamanı TTY maşınında tibb bacısının da olduğu və maşında gözlədiyi qeyd edilmişdi.

Həmin görüntülər yayımlandıqdan sonra mağaza sahibi Sumqayit.tv ilə əlaqə saxlayaraq iddia ilə bağlı öz mövqeyini bildirib. Onun sözlərinə görə, Təcili Yardım sürücüsü mağazaya daxil olsa da, heç bir məhsul almamışdır:

“TTY maşınını paylaşıbsınız. Mən o dükanın sahibiyəm. Heç nə almayıb o yazıq. Sadəcə baxıb "xeyirli olsun" dedi və siqaret alıb çıxdı. Onun də çörəyinə bais olmayaq. Videoda da görünür ki, sürücünün əlində heç bir içki yoxdur,” — deyə mağaza sahibi qeyd edib.

Qeyd edək ki, Sumqayit.tv qarşı tərəflərin mövqeyini işıqlandırmağa hər zaman açıqdır və mövzu ilə bağlı Təcili Tibbi Yardım xidmətinin də münasibətini əldə etməyə çalışacaq.

P.S. Mağazadan təqdim edilən video yalnız sürücünün dükandan çıxma anını əks etdirir. Sürücünün mağazanın içərisində olduğu vaxtlara aid görüntülər redaksiyamıza təqdim olunmayıb.

1-12-2025, 15:51 128