Sumqayıt şəhəri daxil olmaqla müxtəlif regionlarda vakant müəllim yerlərinin seçimi 5 dekabr 2025-ci il tarixinədək mümkündür.
Sumqayıt şəhərində fəaliyyət göstərən incəsənət məktəb və mərkəzlərinə keçirilmiş müsabiqənin nəticələrinə əsasən ehtiyat kadrlar siyahısına daxil edilmiş namizədlər üçün vakant müəllim yerlərinə seçim müddəti 5 dekabr 2025-ci il tarixinədək uzadılıb.
Mədəniyyət Nazirliyindən Sumqayit.tv-ə verilən məlumata görə, pedaqoji kadrlara olan tələbatın qarşılanması məqsədilə Sumqayıt şəhəri daxil olmaqla ümumilikdə 30 müəssisə üzrə 36 vakant yer təqdim olunur. Namizədlər mövcud vakansiyalar arasından seçimlərini əvvəlcədən müəyyən edilmiş qaydalara uyğun olaraq həyata keçirirlər.
Test mərhələsində topladıqları bala əsasən namizədlərin seçim hüquqları belədir:
49 bal və yuxarı nəticə göstərən namizədlər – bütün respublika üzrə vakant yerlər üzrə seçim edə bilərlər;
42 bal və yuxarı nəticə göstərən namizədlər – Bakı istisna olmaqla digər şəhər və rayonlar üzrə seçim edə bilərlər;
35 bal və yuxarı nəticə göstərən namizədlər – Bakı, Gəncə, Sumqayıt və Abşeron istisna olmaqla digər regionlarda seçim edə bilərlər.
Seçim prosesi "MyCulture" şəxsi kabineti vasitəsilə həyata keçirilir. Namizədlər sistemə daxil olaraq uyğun vakant yeri seçməli və seçimi təsdiqləməlidirlər.
Qeyd olunur ki, yerləşdirilmə yalnız namizədin seçdiyi vakant yerlər arasından sistem tərəfindən təsadüfi qaydada aparılır. Buna görə namizədlərin seçim zamanı xüsusilə diqqətli olmaları tövsiyə olunur.
2-12-2025, 15:02
108
