Sumqayıta işləyən avtobus marşrutunda bank kartları ilə ödəniş tətbiq olunur

Sumqayit.tv xəbər verir ki, Bakı–Sumqayıt istiqamətində fəaliyyət göstərən 500 nömrəli marşrut avtobuslarında bank kartları ilə nağdsız ödəniş sisteminin tətbiqinə başlanılıb.

Azərbaycan Yerüstü Nəqliyyat Agentliyinin (AYNA) məlumatına görə, layihə pilot mərhələ çərçivəsində həyata keçirilir. Yeni sistem NFC texnologiyasını dəstəkləyən bütün yerli bank kartları ilə yanaşı, “Apple Pay” və “Google Pay” üzərindən də ödəniş imkanı yaradır.

Pilot mərhələ 1–3 gün ərzində sınaqdan keçiriləcək. Nəticələr təhlil edildikdən sonra sistemin tətbiq dairəsinin genişləndirilməsi nəzərdə tutulur. Gələcəkdə Bakı şəhərindəki bütün marşrut avtobuslarında bu ödəniş mexanizminin tətbiqi planlaşdırılır.

Yeni ödəniş sistemi sayəsində sərnişinlər artıq nağd pul və ya fiziki “BakıKart” daşımadan, bank kartı, mobil telefon və ya ağıllı saat vasitəsilə saniyələr ərzində ödəniş edə biləcəklər. Bunun üçün NFC funksiyalı cihazı validatora yaxınlaşdırmaq kifayətdir.

Qeyd edək ki, “MasterCard” və “Visa” kartları ilə ödəniş sistemi ölkənin bir sıra şəhərlərində, o cümlədən Gəncə və Şamaxıda artıq tətbiq olunur.

20-12-2025, 15:23 294