Sumqayıt şəhərində 12 nömrəli marşrut xətti üzrə sərnişindaşıma ilə bağlı ciddi narazılıqlar müşahidə olunur.
Şəhər sakinləri və tələbələr Sumqayit.tv redaksiyasına müraciət edərək, uzun gözləmə müddəti, köhnə avtobuslar və nəzarətsizlikdən şikayət ediblər. Sakinlərin sözlərinə görə, 12 nömrəli marşrut uzun müddətdir müəyyən edilmiş qrafikə uyğun fəaliyyət göstərmir. Bildirirlər ki, avtobuslar səhər və axşam pik saatlarında 8 dəqiqəlik intervalla hərəkət etməli olsa da, real vəziyyətdə 22 dəqiqədən 40–50 dəqiqəyədək gecikmələr yaşanır. Xüsusilə qeyd olunur ki, Stansiya Sumqayıt ərazisində, 12 nömrəli avtobusun əsas xidmət göstərdiyi məhəllələrdə şəhid ailələri, qazilər və köçkün ailələri yaşayır. Sakinlər bildirirlər ki, bu sosial həssas qruplar üçün nəqliyyatın gecikməsi, nasaz avtobusların xəttə buraxılması və məsul qurumların reaksiyasızlığı daha ciddi problemlər yaradır. Sərnişinlər iddia edir ki, gecikmələr səbəbindən orta və ali məktəb tələbələri dərslərə çata bilmir: “Səhər saatında avtobus gözləmək mümkün deyil. 40 dəqiqəyə yaxın dayanacaqda gözləyirik. Köhnə avtobuslar tez-tez nasazlanır, təmir olunmadan yenidən xəttə buraxılır. Kimə müraciət ediriksə, nəticə olmur”, – deyə sakinlər bildiriblər. Şikayətçilər həmçinin qeyd edirlər ki, marşrut üzrə fəaliyyət göstərən avtobus qarajında nəzarət zəifdir, müraciət edən sərnişinlər bəzən avtobus təsərrüfatının rəhbərliyindən və AYNA nümayəndələrindən kobud münasibətlə qarşılaşdıqlarını iddia edirlər. “Qaraja zəng edəndə sual verməyə qoymurlar, əsəbi şəkildə danışırlar. Niyə avtobus gecikir, niyə nasaz avtobus xəttə buraxılır – bu suallara cavab verilmir”, – şikayətdə vurğulanır. Məsələ ilə bağlı daşıyıcı şirkət və Azərbaycan Yerüstü Nəqliyyat Agentliyinə sorğu ünvanlayırıq. Qurumların mövqeyi daxil olan kimi yayımlanacaq.

23-12-2025, 21:24 322