Bu gün, dekabrın 25-də AZAL-a məxsus mülki təyyarənin Rusiya Federasiyasının Qroznı şəhəri üzərində vurulmasından bir il ötür.
Nəticədə 38 nəfər həlak olmuş, onlarla insan yaralanmışdı. Hadisə regionda və beynəlxalq ictimaiyyətdə ciddi rezonans doğursa da, aradan keçən bir il ərzində Rusiya tərəfi verdiyi vədlərin heç birini yerinə yetirməyib.
Faciədən dərhal sonra Rusiya rəsmiləri, o cümlədən ölkə prezidenti hadisənin obyektiv araşdırılacağı, günahkarların müəyyən ediləcəyi və zərərin kompensasiya ediləcəyi ilə bağlı açıqlamalar versələr də, indiyədək bu istiqamətdə real addımlar atılmayıb. Hadisənin məsuliyyəti ilə bağlı rəsmi mövqe açıqlanmayıb, günahkar şəxslər məsuliyyətə cəlb olunmayıb.
Eyni zamanda, qəza ilə bağlı Qazaxıstan tərəfinin dekabrın 25-də açıqlayacağı bildirilən hesabat da hələlik ictimaiyyətə təqdim edilməyib. Bu isə araşdırma prosesinin uzadılması və məsələnin qeyri-müəyyən saxlanılması ilə bağlı sualları daha da artırır.
Azərbaycan ictimaiyyətində və ekspert dairələrində hesab olunur ki, beynəlxalq aviasiya hüququnun kobud şəkildə pozulduğu bu hadisəyə hüquqi-siyasi qiymət verilməməsi Bakının haqlı narazılığına səbəb olur. Məsələ ilə bağlı rəsmi Bakının səbrinin tükəndiyi, beynəlxalq platformalarda daha sərt mövqe nümayiş etdirə biləcəyi də istisna edilmir.
Qeyd edək ki, AZAL-a məxsus mülki təyyarənin vurulması beynəlxalq aviasiya tarixində ən ağır insidentlərdən biri kimi qiymətləndirilir və hələ də açıq qalan suallar cavabını gözləyir.

Müəllif: Sumqayit.tv