Sumqayıtda avtobus sayı azaldığı üçün 55 nömrəli marşrutda sıxlıq artıb.

Sumqayit.tv redaksiyasına daxil olan şikayətdə bildirilir ki, Hacı Zeynəlabdin qəsəbəsinə gedən 55 nömrəli marşrut xətti üzrə sərnişindaşımada ciddi problemlər meydana gəlib. Bu dəfəki şikayət "Naxalstroy" adlanan yaşayış massivindən gəlib. Şikayətçilər bildiri ki, "Naxalstroy" yaşayış massivi H.Zeynəlabdin qəsəbəsinin ərazisi sayılır və burada yaşayan əhali üçün cəmi 2 avtobusun fəaliyyəti gündəlik nəqliyyat tələbatını ödəmək üçün kifayət etmir.

Sakinlərin sözlərinə görə, bəzən avtobus üçün dayanacaqlarda 30 dəqiqədən 1 saata qədər gözləmək məcburiyyətində qalırlar. Ən problemli saatlar axşam pik vaxtlarında olur.  "Saat 16:30-dan dayanacaqlarda gözləyirik, evə çatmaq isə 1–1,5 saat vaxt aparır. Avtobus gəldikdə isə sərnişin sıxlığından içəri minmək mümkün olmur. Uşağımızı bağçadan götürüb evə qayıtmaq üçün bir saatdan artıq marşrut gözləyirik”, – deyə sakinlər bildiriblər.

Məsələ ilə bağlı əhali bildirir ki, marşrut xəttində ən azı 3–4 avtobusun fəaliyyəti təmin olunsa, problem qismən də olsa aradan qalxar və insanlar vaxtında işdən çıxıb evlərinə çata bilərlər.

Redaksiyamıza daxil olan digər müraciətlər də göstərir ki, Sumqayıtda bir neçə marşrut xəttində oxşar problemlər mövcuddur. Sərnişinlər əsasən avtobus çatışmazlığı, uzun intervallar, köhnə nəqliyyat vasitələri və nəzarətin zəif olmasından narazıdırlar.

Məsələ ilə bağlı daşıyıcı şirkətin və Azərbaycan Yerüstü Nəqliyyat Agentliyinin (AYNA) mövqeyini ictimaiyyətə təqdim etməyə hazırıq.

Müsəllif: Sumqayit.tv

25-12-2025, 16:51 204