Sumqayıt şəhərinin Corat qəsəbəsi, 2-ci məhəllə, Ələğa Vahid küçəsində yol infrastrukturunun bərbad vəziyyətdə olması sakinlərin ciddi narazılığına səbəb olub.
Sözügedən küçədə yaşayan vətəndaşlar Sumqayit.tv-yə bildiriblər ki, yol uzun müddətdir baxımsız vəziyyətdədir və gündəlik hərəkət üçün ciddi çətinliklər yaradır.
Sakinlərin sözlərinə görə, yol örtüyü tamamilə dağılıb, yağışlı havalarda isə ərazi iri gölməçələrlə dolur. Nəticədə həm piyadaların, həm də nəqliyyat vasitələrinin küçədən rahat keçməsi mümkünsüz hala gəlir. Bildirilir ki, xüsusilə payız-qış mövsümündə vəziyyət daha da ağırlaşır.
Şikayətçilər qeyd edirlər ki, problem ilə bağlı dəfələrlə aidiyyəti qurumlara rəsmi müraciətlər ünvanlansalar da, indiyədək hər hansı əsaslı tədbir görülməyib. Küçənin uzun müddətdir diqqətdən kənarda qaldığı iddia olunur.
“Artıq bezmişik. Bilmirik dərdimizi kimə deyək. Bu küçəyə baxan yoxdur”, – deyə sakinlər bildirirlər.
Vətəndaşlar məsələni təsdiqləyən imzalar və şəxsiyyət vəsiqələrinin seriyaları ilə birlikdə müraciətlərini təqdim etdiklərini vurğulayır və problemin ictimailəşdirilməsini xahiş edirlər.
Sumqayit.tv olaraq mövzu ilə bağlı aidiyyəti qurumların mövqeyini öyrənməyə və məsələnin gedişini izləməyə hazırıq. Rəsmi açıqlama daxil olduğu halda ictimaiyyətə təqdim ediləcək.
26-12-2025, 17:50
138
