Sumqayıt şəhəri, Yeni Saray qəsəbəsində uzun müddətdir ki, ciddi ekoloji problem yaşanır. Qəsəbə ərazisinin müxtəlif hissələrində məişət və tikinti tullantılarının nəzarətsiz şəkildə atılması nəticəsində açıq sahələr faktiki olaraq zibilliyə çevrilib.
Sakinlərin Sumqayit.tv-yə bildirdiyinə görə, tullantılar yol kənarlarına, boş ərazilərə və yaşayış məntəqələrinə yaxın sahələrə atılır. Zibilin vaxtında yığılmaması və nəzarətsiz qalması nəticəsində ərazidə kəskin qoxu, antisanitar vəziyyət və ekoloji balansın pozulması müşahidə olunur. Bu hal xüsusilə yay aylarında insan sağlamlığı üçün ciddi risk yaradır.
Məlumata görə, yaranmış vəziyyət artıq sakinlər üçün adi hala çevrilsə də, problemin miqyası getdikcə genişlənir. Qəsəbə ərazisində tullantıların daşınmasına və təmizliyə cavabdeh olan qurumlar tərəfindən isə effektiv və davamlı nəzarətin olmadığı bildirilir.
Sakinlər qeyd edirlər ki, mövcud vəziyyət təkcə ətraf mühitə deyil, eyni zamanda burada yaşayan insanların sağlamlığına da birbaşa təhlükə yaradır. Uşaqların oynadığı ərazilərin yaxınlığında zibillərin yığılması, tikinti tullantılarının açıq sahələrdə saxlanılması ciddi narahatlıq doğurur.
Yeni Saray qəsəbə sakinləri aidiyyəti qurumlara müraciət edərək ərazidə təcili təmizlik işlərinin aparılmasını, zibillərin mütəmadi şəkildə daşınmasını, ətraf mühiti çirkləndirən şəxslərin məsuliyyətə cəlb olunmasını və davamlı nəzarət mexanizminin yaradılmasını tələb edirlər.
Qeyd edək ki, məsələ ictimai əhəmiyyət daşıyır və regionda ekoloji təhlükəsizliyin təmin olunması baxımından xüsusi diqqət tələb edir.
Sumqayit.tv olaraq problemin həlli ilə bağlı aidiyyəti qurumların mövqeyini öyrənməyə və məsələni diqqətdə saxlamağa davam edəcəyik.
VİDEO-Link: (90)Yeni Saray zibilliyə çevrilib Sumqayıt şəhəri, Yeni Saray qəsəbəsində ... | TikTok
5-01-2026, 21:31
161
