Sumqayıt şəhərinin Stansiya ərazisində fəaliyyət göstərən sabun sexinin fəaliyyəti yerli sakinlərin narazılığına səbəb olub.

Sakinlər Sumqayit.tv-yə müraciət edərək bildiriblər ki, müəssisə istehsal prosesi zamanı ətrafa kəskin və zərərli qoxu yayan, sağlamlığa mənfi təsir göstərən maddələr buraxır. Onların sözlərinə görə, bu qoxular xüsusilə axşam və gecə saatlarında daha intensiv hiss olunur, nəfəs almaqda çətinlik yaradır və ərazidə yaşamağı mümkünsüz edir.

Vətəndaşlar bildirirlər ki, məsələ ilə bağlı dəfələrlə müəssisə rəhbərliyinə iradlarını çatdırsalar da, problem aradan qaldırılmayıb.

Bununla bağlı Sumqayit.tv vasitəsilə ərazi sakinləri Ekologiya və Təbii Sərvətlər Nazirliyinə, Dövlət Ekoloji Təhlükəsizlik Xidmətinə, Azərbaycan Respublikasının Qida Təhlükəsizliyi Agentliyinə (AQTA), Səhiyyə Nazirliyinin Respublika Gigiyena və Epidemiologiya Mərkəzinə, eləcə də Sumqayıt Şəhər İcra Hakimiyyətinə müraciət edərək sözügedən müəssisənin fəaliyyətinin araşdırılmasını, ekoloji və sanitar normalara əməl olunmasına nəzarətin gücləndirilməsini xahiş edirlər.

Sumqayit.tv olaraq məsələni diqqətdə saxlayaraq aidiyyəti qurumların və sözügedən sexin mövqeyini dərc etməyə hazırıq.

14-01-2026, 20:43 208