Dövlət İmtahan Mərkəzi (DİM) 2026-cı il üzrə buraxılış və qəbul imtahanlarının keçirilmə tarixlərini açıqlayıb. Sumqayıt şəhərində təhsil alan şagird və abituriyentlər üçün də imtahan cədvəli müəyyənləşib.

Sumqayit.tv xəbər verir ki, tam (11 illik) orta təhsil səviyyəsi üzrə buraxılış imtahanları iki zona olmaqla 9 və 15 mart tarixlərində keçiriləcək. DİM-in məlumatına görə, Sumqayıt şəhərində yerləşən məktəblərin şagirdləri hərəkət intensivliyinin azaldılması məqsədilə imtahanı iki günə bölünməklə – I və II hissə üzrə verəcəklər.

Bildirilib ki, Sumqayıt və Abşeronda yerləşən peşə liseylərinin məzunları buraxılış imtahanını martın 9-da verəcəklər. İmtahana buraxılış vərəqələri isə hər imtahan günündən 5 gün əvvəl DİM-in rəsmi internet səhifəsində yerləşdiriləcək.

Ümumi (9 illik) orta təhsil səviyyəsi üzrə buraxılış imtahanları isə ölkə üzrə üç zona olmaqla 5, 12 və 26 aprel tarixlərində təşkil olunacaq. Bu imtahanlar üzrə zonalara daxil olan şəhər və rayonların siyahısı imtahandan bir ay əvvəl açıqlanacaq.

Ali təhsil müəssisələrinə qəbul olmaq istəyən Sumqayıtlı abituriyentlər üçün qeydiyyat (ərizə qəbulunun I mərhələsi) 18 fevral – 5 mart tarixlərində aparılacaq.

Əvvəlki illərin məzunları üçün qəbul imtahanının birinci mərhələsi 19 aprel tarixində keçiriləcək.
I, II, III və IV ixtisas qrupları üzrə qəbul imtahanlarının ikinci mərhələsinin birinci cəhdi may–iyun aylarında təşkil olunacaq. Bu mərhələdə iştirak üçün qeydiyyat aprel–may aylarında aparılacaq.

Qeyd edək ki, qəbul və buraxılış imtahanları ilə bağlı digər tarixlər və detallı qrafiklər DİM tərəfindən ayrıca cədvəl formasında təqdim edilib.

Sumqayit.tv imtahanlarla bağlı yenilikləri diqqətdə saxlayaraq oxuculara operativ şəkildə çatdıracaq.

22-01-2026, 12:30 387