2025-ci ilin yekunları və qarşıda duran vəzifələrə həsr olunmuş hesabat yığıncağında Sumqayıt şəhərinin sosial-iqtisadi inkişaf göstəriciləri ilə yanaşı, mövcud problemlər də müzakirə olunub.
Bu kontekstdə küçələrdə, mikrorayon və məhəllələrdə yol infrastrukturu, yaşayış binalarının vəziyyətinə dair məsələlərin həlli ilə bağlı prioritetləri öyrənmək istədik. Məsələ ilə bağlı 46 saylı Sumqayıt beşinci seçki dairəsindən Milli Məclisə deputat seçilmiş Elnarə Akimovaya suallar ünvanladıq.
Milli Məclisin deputat Elnarə Akimova Sumqayit.tv-yə açıqlamasında bildirdi ki, hesabat yığıncağında Sumqayıtın 2025-ci ildə əldə etdiyi sosial-iqtisadi nailiyyətlərlə yanaşı, şəhərin inkişafı fonunda mövcud olan problemlər də açıq və obyektiv şəkildə müzakirə olundu.
Onun sözlərinə görə, son illər Sumqayıtda genişmiqyaslı quruculuq və abadlıq işləri aparılsa da, bir sıra məsələlər hələ də prioritet olaraq qalır:
“Yol infrastrukturunun köhnəlməsi, kanalizasiya və mühəndis-kommunikasiya xətlərinin yenilənməsi, eləcə də istismar müddətini başa vurmuş yaşayış binaları ilə bağlı problemlər diqqət mərkəzindədir. Bu istiqamətdə mərhələli yanaşma müəyyən edilib. Əsas vəzifələr sırasında yolların əsaslı təmiri və yenidən təşkili, köhnə kanalizasiya sistemlərinin müasir standartlara uyğun qurulması, təhlükə yaradan binaların sökülməsi və onların yerində müasir, təhlükəsiz yaşayış binalarının inşası dayanır”.
Millət vəkili çıxışı zamanı vurğuladığı bu məsələləri konseptual şəkildə gündəmə gətirib və Sumqayıtın yenidən qurulmasının yalnız vizual dəyişiklik olmadığını xüsusi qeyd edib:
“Sumqayıtın inkişafı insan həyatının keyfiyyətinə xidmət edən dərin və davamlı şəhərsalma prosesidir. Uzun illər istismar olunmuş yaşayış binalarının mərhələli şəkildə yenilənməsi, yolların və kommunikasiya xətlərinin müasir şəhər tələblərinə uyğunlaşdırılması insan amilini əsas hesab edən dövlət siyasətinin real təzahürüdür. Bu problemlər hesabatda xüsusi olaraq qeyd olundu və onların həlli gələcək mərhələlər üçün əsas prioritetlər sırasında göstərildi”.
Elnarə Akimova əminliklə bildirdi ki, icra hakimiyyətinin müəyyən etdiyi konkret tədbirlər planı və ardıcıl şəhərsalma siyasəti nəticəsində Sumqayıtda yol infrastrukturu, yaşayış fondunun yenilənməsi və ümumi yaşayış mühiti ilə bağlı problemlər mərhələli şəkildə aradan qaldırılacaq:
“Məqsəd təkcə bu günün çətinliklərini aradan qaldırmaq deyil, gələcək nəsillər üçün daha təhlükəsiz, daha rahat və yaşamaq üçün daha cəlbedici bir Sumqayıt formalaşdırmaqdır”.
Müəllif: Sumqayit.tv
31-01-2026, 16:31
461
