Sumqayıt şəhər sakini Nihad Abbasov beynəlxalq onlayn alış-veriş platforması Temu və yerli çatdırılma xidməti Demir Cargo ilə bağlı redaksiyamıza şikayət ünvanlayıb.

Şikayətçinin bildirdiyinə Sumqayit.tv-yə bildirdiyinə görə, 10 yanvar 2026-cı il tarixində anasının adına Temu platforması üzərindən sifariş etdiyi bağlama izləmə nömrəsi TM4177841 ilə göndərilib. Bağlamanın tərkibində qadın ayaqqabısı, çanta və üz üçün masaj aləti olub. Daha sonra sifarişin bir hissəsi ləğv edilsə də, iki məhsulun göndərişi davam edib.

Nihad Abbasovun sözlərinə görə, bağlama 9 fevral tarixində Bakıdan gömrük nəzarətindən problemsiz şəkildə çıxıb, bütün bəyannamə prosedurları vaxtında yerinə yetirilib. Lakin bağlama Sumqayıta çatdığı və Demir Cargo-nun çeşidləmə mərhələsində olduğu halda, heç bir əsas göstərilmədən birbaşa Çinə – Temu şirkətinə geri qaytarılıb.

Şikayətçi iddia edir ki, sistemdə geri qaytarılma səbəbi kimi yalnız “gecikmə” göstərilib, lakin bağlamadan imtina edilməyib və ünvanla bağlı heç bir problem olmayıb:

“Puldan söhbət getmir. Mən istehlakçı kimi hüququmun tapdanmasından danışıram. Bağlama gömrükdən çıxıb, yoldadır, hər gün statusu izləyirdim. Birdən-birə yazıldı ki, geri qaytarılıb. Bu necə ola bilər?”

Şikayətçi bildirir ki, Demir Cargo ilə əlaqə saxlamaq mümkün olmayıb, zənglər cavabsız qalıb, sosial şəbəkələr üzərindən ünvanlanan müraciətlərə isə reaksiya verilməyib. Temu platforması isə məsuliyyəti kargo şirkətinin üzərinə ataraq məsələnin onların səlahiyyətində olmadığını bildirib.

Qeyd edək ki, sonradan Temu tərəfindən sifarişin bəzi hissələri üzrə qismən geri ödəniş edilsə də, Nihad Abbasov bunu problemin həlli hesab etmir:

“Mən məhkəməyə müraciət edəcəyimi deyəndən sonra tələsik şəkildə fərqli izahlar verdilər, qismən pul qaytardılar. Amma məsələ pul deyil. İnsanları belə süründürmək olmaz.”

Şikayətçi hesab edir ki, Temu və kargo şirkəti arasında məsuliyyətin ötürülməsi istehlakçı hüquqlarının kobud şəkildə pozulmasına gətirib çıxarır və bağlamanın geri qaytarılması üçün heç bir hüquqi əsas olmayıb.

Sumqayit.tv qarşı tərəflərin mövqeyini öyrənmək üçün Temu və Demir Cargo ilə əlaqə saxlamağa hazırdır.

17-02-2026, 16:55 288