Sumqayıt şəhərində içməli su xəttində yaranan problem uzun müddətdir ki, aradan qaldırılmır. Söhbət 10-cu mikrorayon, 65 saylı binanın arxa hissəsində, Koroğlu küçəsinin yola baxan piyada hissəsindən gedir.
Ərazidə yaşayab sakinlərin akinlərin Sumqayit.tv-yə verdiyi məlumata görə, artıq 4-5 gündür ki, sözügedən ərazidə içməli su xəttində partlayış baş verib. Aidiyyəti qurum – Su Kanal İdarəsinin əməkdaşları əraziyə baxış keçirsə də, problem köklü şəkildə həll olunmayıb.
Bildirilir ki, qurum əməkdaşları əraziyə gəlib qazıntı aparır, torpaq tökür və müvəqqəti tədbirlərlə işi yekunlaşdıraraq ərazini tərk edirlər. Lakin 2–3 gün sonra eyni nöqtədən yenidən içməli su yer səthinə axmağa başlayır. Nəticədə su yol boyu axaraq asfalt örtüyünü tamamilə sıradan çıxarıb.
Hazırda həmin hissə nə piyadalar, nə də avtomobillər üçün yararlıdır. Yolun asfalt örtüyü dağılıb, keçid isə təhlükəli vəziyyətə düşüb. Üstəlik, yaxınlıqda daha iki ayrı nöqtədən də içməli suyun açıq şəkildə axdığı müşahidə olunur ki, bu da problemin miqyasının daha böyük olduğunu göstərir.
Sakinlər bildirirlər ki, axan içməli su dövlətə külli miqdarda maddi ziyan vurur, yol infrastrukturu isə getdikcə daha da yararsız hala düşür. Buna baxmayaraq, problem hələ də əsaslı şəkildə həllini tapmayıb.
Vətəndaşlar Sumqayit.tv vasitəsilə aidiyyəti qurumlardan xahiş edirlər ki, məsələni nəzarətə götürsünlər, müvəqqəti yox, əsaslı və uzunmüddətli təmir işləri aparılsın, yol və su xətti bərpa edilsin.

VİDEO LİNK: TikTok - Make Your Day

4-03-2026, 21:16 202