“Yol hərəkəti haqqında” Qanunun 49‑cu maddəsinə əsasən, nəqliyyat vasitələrinin sürücüləri normal hərəkət zamanı vəziyyətdən asılı olaraq yolun hərəkət hissəsinin sağ kənarı ilə hərəkət etməlidirlər.

Sumqayit.tv xəbər verir ki, bununla bağlı Daxili İşlər Nazirliyinin Nəqliyyatı İntellektual İdarəetmə Mərkəzi sürücülərə müraciət edib.

Bildirilib ki, yaşayış məntəqələrindən kənarda, eləcə də yaşayış məntəqələrində 5.1 (avtomagistral) və ya 5.3 (avtomobil yolu) nişanları ilə işarələnmiş yollarda sağ zolaq boş olduğu halda sol zolaqlarla hərəkət etmək qadağandır.

Qurum qeyd edir ki, təəssüf ki, paytaxt yollarında sağ zolaq boş olduğu halda sol zolaqda hərəkət edən sürücülərə tez‑tez rast gəlinir. Bu cür hallar xüsusilə çoxzolaqlı və intensiv hərəkət olan yollarda müşahidə olunur. Belə yollar sırasında Aeroport şosesi, Heydər Əliyev prospekti, Ziya Bünyadov prospekti və Bakı‑Sumqayıt şosesi göstərilir.

Məlumata görə, bəzi sürücülər sol zolaqda hərəkət edərkən uzaq işıqları yandırıb‑söndürməklə digər avtomobillərdən yol tələb edir, sürəti qəfil artırır və düzgün ara məsafəsi saxlamırlar. Bu isə qəza riskini artırmaqla yanaşı, digər sürücülər üçün də təhlükəli vəziyyət yaradır.

Qanunvericiliyə əsasən, yalnız operativ nəqliyyat vasitələri üstün keçid hüququna malikdir və onlar yaxınlaşdığı zaman digər sürücülər zolağı boşaltmalıdır. Bunun üçün həmin nəqliyyat vasitələri xüsusi işıq və səs siqnallarından istifadə etməlidir.

Qurum sürücülərə müraciət edərək yollarda hərəkət zamanı sağ zolaqlara üstünlük verməyi və sol zolaqları zəruri hallarda istifadə etməyi tövsiyə edib.

10-03-2026, 13:47 256