Sumqayıtda aramsız yağan yağışlar bir sıra ərazilərdə ciddi fəsadlara səbəb olub.

Sumqayit.tv redaksiyasına daxil olan məlumata görə, ən çox zərər çəkən ərazilərdən biri Stansiya Sumqayıt və Dəmiryolunun Yük Həyəti adlanan yaşayış sahəsidir. Bildirilir ki, həmin ərazidə yerləşən evlərin əksəriyyəti hazırda su altında qalıb.

Sakinlərin sözlərinə görə, 2012-ci ildə salınan qəsəbədə bu günədək kanalizasiya şəbəkəsi qurulmayıb. Nəticədə yağış suları ilə “şambo” adlanan tullantı çuxurlarının suları bir-birinə qarışaraq ərazidə ağır sanitar vəziyyət yaradıb. Hazırda qəsəbədə kəskin üfunət qoxusunun yayıldığı bildirilir.

Məlumatda o da qeyd olunur ki, güclü yağıntılar nəticəsində bəzi fərdi yaşayış evlərində çatlar əmələ gəlib. İlkin olaraq iki evdə bu cür halın müşahidə edildiyi vurğulanır.

Sakinlər yaranmış vəziyyətlə bağlı aidiyyəti qurumların məsuliyyət daşıyıb-daşımadığını və zərər görmüş evlərə kompensasiyanın necə ödəniləcəyini sual edirlər.

Məsələ ilə bağlı rəsmi qurumların mövqeyini işıqlandırmağa hazırıq.

Müəllif: Sumqayit.tv

31-03-2026, 17:02 240