Sumqayıt şəhərində Sülh küçəsində yerləşən “Kristal”ın “Yeni Sumqayıt” layihəsi ilə bağlı bir qrup sakin təhvil prosesində gecikmə yaşandığını iddia edir.

Sumqayit.tv-yə daxil olan müraciətdə sakinlər bildiriblər ki, mənzilləri 2025-ci ilin yayında əldə ediblər və imzaladıqları müqaviləyə əsasən binaların tikintinin başlanğıc tarixindən iki il sonra təhvil verilməsi nəzərdə tutulub. Onların sözlərinə görə, həmin layihədən daha əvvəl – 2023-cü ildən mənzil alanlar da mövcuddur.

İddialara görə, şirkət tərəfindən ilkin olaraq mənzillərin 2025-ci ilin dekabr ayında təhvil veriləcəyi bildirilsə də, son aylarda prosesin uzandığı qeyd olunur.

Sakinlər gecikmənin səbəbi kimi kanalizasiya sisteminin magistral xəttə qoşulması ilə bağlı texniki işlərin uzanmasını göstərildiyini bildirirlər.

Onların sözlərinə görə, binalarda daxili təmir işləri əsasən yekunlaşıb. Bununla belə, qaz sayğaclarının quraşdırılması və həyətyanı ərazilərdə görüləcək bəzi işlər hələ tamamlanmayıb.

Qeyd olunur ki, layihə üzrə yüzdən artıq sakinin olduğu bildirilir. Hazırda 15 nəfərlik ilkin təşəbbüs qrupu formalaşdırılıb və yaxın günlərdə genişləndirilməsi planlaşdırılır. Sakinlər məsələ ilə bağlı şirkətin satış ofisinə müraciət etməyə hazırlaşırlar.

Qeyd: Məsələ ilə bağlı tikinti şirkətinin mövqeyini dərc etməyə hazırıq.

7-04-2026, 19:54 377