Stansiya Sumqayıt və Yük Həyətində yaranan bataqlıqlarda quşların məskən saldığı müşahidə olunur.
Sumqayit.tv redaksiyasına daxil olan müraciətdə bildirilib ki, aramsız yağan yağışlardan sonra Sumqayıtın bəzi ərazilərində vəziyyət hələ də dəyişməyib. Bir sıra yerlərdə yağış suları çəkilmədiyindən sakinlər çətinlik yaşayır.
Şikayətdə qeyd olunur ki, xüsusilə kanalizasiya və yağış kollektoru sistemi olmayan ərazilərdə küçələr, boş sahələr və yollar su altında qalır. Bəzi qəsəbələrdə isə artıq bataqlıq sahələrinin sayı artıb.
Müraciətdə diqqət çəkilən ərazilərdən biri də Stansiya Sumqayıt və Dəmiryolunun Yük Həyətinin son hissəsidir. Bildirilir ki, burada yaranan bataqlıqlarda çoxlu sayda quşların məskən saldığı müşahidə olunur. Kadrlarda əsasən cüllüt quşları görünür. Ara-sıra isə qaşqaldaq və qarabatdaq quşları da görüntülənir.
Sakinlər ümid edirlər ki, aidiyyəti qurumlar məsələni nəzarətə götürəcək və ərazilərdə yağış sularının yığılması probleminin həlli istiqamətində addımlar atılacaq.
Video LİNK: Sumqayıtın bəzi ərazilərində yağış suları hələ də çəkilməyib. Sakinlər... | TikTok
20-04-2026, 12:34
340
