Sumqayıt sakinləri 7 nömrəli marşrut avtobusunun hərəkət istiqaməti ilə bağlı narazılıq edirlər.
Sumqayit.tv-yə daxil olan müraciətdə bildirilir ki, bəzi hallarda 7 nömrəli marşrut avtobusu avtovağzal ərazisinə daxil olmadan birbaşa Sülh küçəsinə istiqamətlənir. Sakinlərin sözlərinə görə, bu vəziyyət avtovağzal istiqamətində hərəkət edən sərnişinlər üçün ciddi çətinlik yaradır.
Redaksiyamıza göndərilən və 15.05.2026-cı il tarixində çəkildiyi bildirilən fotoda 50-AB-363 dövlət qeydiyyat nişanlı avtobus əks olunub.
Vətəndaşlar qeyd edirlər ki, marşrutun müəyyən olunmuş xətt üzrə hərəkət etməməsi sərnişinlərin narazılığına səbəb olur.
“7 nömrəli avtobus avtovağzala girmədən birbaşa Sülh küçəsinə dönür. Bu isə marşrut xəttindən çıxmaq deməkdir. Camaatın əsəbi ilə oynayırlar”, – deyə müraciətdə bildirilir.
Sakinlər aidiyyəti qurumlardan məsələ ilə bağlı araşdırma aparılmasını və marşrut xəttinə nəzarətin gücləndirilməsini xahiş edirlər.
Qarşı tərəfin mövqeyini dərc etməyə hazırıq.
15-05-2026, 16:00
274
