Sumqayıt şəhərinin Stansiya Sumqayıt ərazisində yerləşən “Şəfəq” qəsəbəsinin sakinləri yolun vəziyyəti ilə bağlı narahatlıqlarını bildirirlər.
Sumqayit.tv-yə daxil olan müraciətdə qeyd olunur ki, son bir ay ərzində Məcburi Köçkünlər üçün salınmış qəsəbə ərazisində hər gün iri tonnajlı “KamAZ” markalı yük maşınları hərəkət edir.
Sakinlərin sözlərinə görə, yük maşınları Təmizləyici Su Nasos Stansiyası istiqamətinə material daşıyır və bu səbəbdən ərazidəki asfalt örtüyü sürətlə sıradan çıxmağa başlayıb.
Bildirilir ki, artıq yolun bəzi hissələrində çökmələr və deformasiya halları müşahidə olunur.
“Bu vəziyyət həm dövlət tərəfindən çəkilmiş yolun qısa müddətdə yararsız hala düşməsinə, həm də gələcəkdə sakinlərin hərəkətində ciddi problemlərin yaranmasına səbəb ola bilər”, – deyə müraciətdə vurğulanır.
Sakinlər aidiyyəti qurumlardan məsələyə nəzarət olunmasını və yolun daha da zədələnməsinin qarşısının alınmasını xahiş edirlər.
Qarşı tərəfin mövqeyini dərc etməyə hazırıq.
22-05-2026, 19:18
202
