ABŞ dövlət katibi Marko Rubionun mayın 26-da Ermənistana planlaşdırılan səfəri regionda yeni geosiyasi müzakirələr yaradıb. Rəsmi İrəvan səfərin detalları barədə hələ açıq məlumat verməsə də, Ermənistan xarici işlər naziri Ararat Mirzoyanın açıqlamaları göstərir ki, görüşlərin gündəliyində ciddi məsələlər yer alır.
Ən diqqət çəkən məqamlardan biri isə Ermənistan tərəfinin jurnalistlərin suallarına tam aydın cavab verməməsi oldu. Xüsusilə “TRIPP” və ya “Tramp marşrutu” ilə bağlı sualların cavabsız qalması regionda müxtəlif ehtimalları gündəmə gətirib.
Əslində, ABŞ rəsmisinin Ermənistana səfəri təsadüfi görünmür. Son illər Ermənistanın Qərbə inteqrasiya xəttini gücləndirməsi, Rusiya ilə münasibətlərdə yaranan gərginlik və Avropa ilə yaxınlaşma cəhdləri Vaşinqtonun regiona marağını daha da artırıb.
Paşinyan hakimiyyəti bir tərəfdən Moskvanın təsirindən çıxmağa çalışır, digər tərəfdən isə Qərbin siyasi və iqtisadi dəstəyini əldə etməyə çalışır. ABŞ isə Cənubi Qafqazda yeni balans formalaşdırmaq niyyətini açıq şəkildə nümayiş etdirir.
Marko Rubionun səfəri məhz bu baxımdan diqqətlə izlənilir.
Ekspertlər hesab edirlər ki, səfər zamanı regional nəqliyyat layihələri, Ermənistanın təhlükəsizlik məsələləri, Qərbin investisiyaları, İran və Rusiya faktorları, Azərbaycan-Ermənistan arasında aparılan sülh prosesi və digər mövzular müzakirə oluna bilər.
Xüsusilə son dövrdə ABŞ-ın regionda diplomatik fəallığının artması Vaşinqtonun Cənubi Qafqazı yeni geosiyasi mərhələnin mühüm hissəsi kimi gördüyünü göstərir.
Digər maraqlı məqam isə Ermənistan tərəfinin “seçki ilə əlaqəsi yoxdur” mesajı verməsidir. Bu isə əksinə, bəzi siyasi dairələrdə səfərin daxili siyasi proseslərlə əlaqəli ola biləcəyi barədə ehtimalları artırır.
Reallıq budur ki, Paşinyanının Qərbyönümlü siyasi xətt yürütməsi artıq daxili siyasi mübarizənin əsas mövzularından birinə çevrilib. Moskva Paşinyanın məğlub olması üçün var gücü ilə Rusiyay bağlı olan namizədləri dəstəkləyir.
Bütün bunların fonunda Marko Rubionun İrəvan səfəri təkcə diplomatik görüş yox, həm də regionun gələcək siyasi xəritəsinə təsir edə biləcək hadisə kimi qiymətləndirilir.
Sumqayit.tv Təhlil bölməsi
25-05-2026, 12:56
126
